Home Feature Voluntariu PAJ, Rodriguês: Uma Be Hoban Hela iha Tasi Tolu Maibe Kontinua...

Voluntariu PAJ, Rodriguês: Uma Be Hoban Hela iha Tasi Tolu Maibe Kontinua Tulun Ema Seluk

1018
0
Rodrigues nia uma iha Tasi Tolu be hoban hela (Foto: SEJD)

By Cesarino da Silva

Saida mak ita halo se be tama ita nia uma? Karik ita sei konsentra deit ba hamoos ita nia uma. Ka hases an, buka fatin seguru hodi hein, bainhira be tun ita fila fali ba ita nia uma. Maibe ida ne’e laos saida mak Rodriguês hanoin. Nia hatene be Tasi Tolu kleur mak sei maran, ema seluk presija nia tulun no nia labele tur hein deit haree ema seluk nia susar.

Rodriguês Alves Martins, tinan 26, hela iha fatin deslokadu Tasi Tolu, iha ninia maun sira nia uma. Rodriguês nia uma be tama metru ida liu, nia la konsege salva sasan, no uma be hoban to’o agora. Rodrigues seidauk fila ba nia uma. Maski nune’e Rodriguês la tahan haree ema seluk nia sofrementu ba dezastre inundasaun nian. Aprende iha organizasaun União Escuterio Timor-Leste (UNETL) hanorin nia atu fo tulun ba ema seluk no halo servisu iha ekipa. 

Voluntariu Posku Asaun Juventude (PAJ), Rodrigues Alves Martins (Foto: Cesarino)

Rodriguês Alves Martins, koñesidu liu ho naran Rodriguês. Nia moris iha Atabae, munisipiu Bobonaro iha loron-27 fulan-Jullu tinan-1995. Dadauk ne’e hala’o hela ninia estudu iha Universidade Nasional Timor Lorosa’e (UNTL), Fakuldade Ekonomia no Jestaun, Departamentu Komersiu no Industria (semester 7).

Rodriguês muda mai hela iha Dili, iha area Tasi-Tolu, besik estatua João Paulo II iha tinan-2014, wainhira mai kontinua ninia estudu sekundariu iha Dili. Iha tasitolu, Rodrigues hela ho nia bin. Ladun hatene diak kona-ba regulamentu sira no mós tamba laiha autoridade ruma bandu ka impede, Nia bin ho familia harii uma iha rai besik lagoa tasi-tolu ne’ebé familia husi Rodrigues nia kuñadu mak oferese.

Tasitolu, liuliu area lagoa nian, hanesan mós area ida ne’ebé afeta maka’as husi kalamidade klimátika iha loron-4 fulan-Abril tinan-2021. Rodrigues nia hela fatin la eskapa husi kalamidade ida ne’e. Ninia bin nia uma, ne’ebé Rodrigues hela ba ho viziñu sira nia hela fatin, to’o ohin loron bee sei nakonu no ninia familia seidauk bele fila ba hamós no ba hela iha ne’ebá.

Hafoin udan la para durante loron rua ka tolu nia laran, iha 4 Abril bee hahu tama uma ne’ebé Rodrigues ho nia familia hela ba. Iha dadersan nakukun tuku 4, Rodriguês ho familia obrigadu tenki halai sai husi uma tanba bee tama halo nakonu uma laran tomak no sira laiha kbiit atu satan.

“Kulisaun ne’ebé hau toba ba bokon hotu no wainhira hau hakfodak, hau ho kulisaun  namlele hela iha bé leten. Ho lalais hau bolu nia bin ho subriñu sira atu salva an husi bee ne’ebé sa’e ba bebeik iha uma laran,” Rodrigues haktuir istoria inundasaun mak nia hasoru.

Rodrigues nia uma iha Tasi Tolu be hoban hela (Foto: SEJD)

Hamutuk ho familia, Rodriguês evakua ba nia maun sira ne’ebé hela besik iha area ne’ebá maibé ladún afetadu tanba sira nia uma iha rai aas. Rodrigues kontinua ajuda familia iha uma kain 3 seluk no halo esforsu hodi salva sasan importante sira.

“Hau evakua tiha hau bin ho subrinu sira, ho sasan importante sira ba hau maun sira nia uma, hau fila fali hodi ajuda evakua viziñu sira iha uma kain 3 ne’ebé sira hela besik malu,” Rodrigues haktuir istoria moruk ne’e ho laran triste.

“Hau koko salva sasan sira iha nia bin nia uma laran, inklui jeleira, televizaun. hau tula sasan hirak ne’e ba meja leten. Maibé, esforsu ne’e la konsege salva sasan sira ne’e hotu. Be aumenta ba bebeik sai aas liu tiha meja ne’ebe hau tula sasan ba leten. Bee as liu metro 1 ho balu no sasan hirak ne’e mós la aproveita”, Rodrigues hatutan.

Maske hasoru susar boot ida ne’e, Rodrigues hanoin katak nia sei sorte liu ema barak. Ho ninia konvikasaun ida ne’e mak lori nia mai halibur hamutuk ho ninia maluk joven atus ba atus iha Posku Asaun Juventude (PAJ) iha SEJD hodi presta servisu voluntariu, tulun maluk sira seluk ne’ebé afetadu husi kalamidade klimátika Siklone Tropikal Seroja. Rogrigues hatete katak enkuantu nia hein bee iha lagoa tasi-tolu tun, nune’e nia ho familia bele fila ba hamos sira nia uma hodi bele hela fila fali, nia deside hodi dedika nia tempu no enerjia fo tulun ba ema seluk hamós sira nia uma no bele fila fali ona ba sira nia hela fatin.

Alén de nu’udar estudante iha UNTL, Rodrigues mós afilia no sai membru ida ba organizasaun União Escuterio Timor-Leste (UNETL). Rodrigues hahu sai membru ativu UNETL iha tinan-2012. UNETL mak organizasaun ida ne’ebe hanorin Rodrigues konaba valores hosi tulun malu. UNETL parseiru ida, entre parseiru sira seluk, ne’ebé hamutuk ho Sekretariu Estadu Juventude no Desportu (SEJD) harii Posku Asaun Juventude, iha loron-6 fulan-Abril tinan-2021.

Hafoin estabelesimentu PAJ, Rodrigues hetan informasaun husi ninia kolega sira iha UNETL kona-ba PAJ, nia objetivu no servisu sira. Ho haksolok Rodriguês deside kedas hodi mai halo parte ba PAJ hamutuk ho ninia organizasaun UNETL hodi involve iha asaun voluntariu sira komesa iha loron-7 fulan-Abril. Iha PAJ, Rodriguês serbisu hamutuk ho joven voluntariu atus ida resin hosi organizasaun oi-oin. Rodrigues kontente bele hasoru malu no serbisu hamutuk ho joven atus ida resik seluk; tun direta ba bairu afetadu sira hodi suru tahu, rai henek, fase uma laran inklui hamoos valeta ne’ebé iha komunidade sira nia hela fatin no tulun liu ba kbiit laek sira no sira ne’ebé vulneravel liu.

Rodrigues fo hela apoio ba hamoos uma ida iha Aitarak Laran

Rodriguês involve iha grupo três PAJ nian hodi halo servisu ba komunidade iha fatin afetadu sira iha area sira hanesan: Becora (Fatuk Francisco), iha Becusse, iha Aitarak Laran no iha fatin sira seluk hamutuk uma kain 53 mak ekipa ne’e liberta ona, hamoos dalan publiku iha fatin 3 no valeta 1. Tamba rezultadu husi voluntariu sira PAJ nia serbisu hirak ne’e, oras ne’e familia 53 husi komunidade afetadu sira mak fila fali ona ba sira nia hela fatin.

“Maske ha’u mós afetadu husi inundasaun ida ne’e, maibé sei iha ema seluk mak sofre liu fali ha’u, no sira presiza tebes ita nia ajuda,” Rodrigues hatete hodi reflete ninia esperiensia serbisu iha PAJ. Ho hamnasa haksolok no orgullu, Rodriguês haktuir tan katak “nu’udar joven presiza halo saida mak ita bele halo tanba iha situasaun ida ne’e ema barak hasoru difikuldades”.

Haktuir kona-ba motivasaun saida mak halo nia hola dalan ba tulun ema seluk, maske nia rasik hasoru hela problema iha ninia uma, Rodrigues haktuir, “ami iha UNETL kaer ba prinsipiu liman fuan 3 mak; Serví ba Maromak, Serví ba Nasaun no Serví ba ita nia-an rasik, liafuan tolu ne’e mak motiva ha’u hakarak ajuda ema seluk iha situasaun defisil ida ne’e.”

Maske Rodrigues relata ho haksolok no orgullu, iha terrenu Rodriguês ho nia kolega sira seluk iha PAJ hasoru difikuldades oi-oin. Dalaruma komunidade ka uma na’in balu hasai liafuan kroat hasoru sira, manda sira halo servisu barak liu, hakilar tanba tenki hamós ho kuidadu atu labele estraga uma na’in nia keramik iha uma laran no buat seluk tan. Joven voluntariu sira ne’e hala’o esperiensia moruk sira hanesan ne’e ho pasiensia maske ho kondisaun hamlaha no kolen, sira halo saida mak sira bele halo tamba sira rasik deside no dedika ona sira nia an atu halo serbisu solidariedade ida ne’e. Rodrigues esplika katak buat hirak ne’e mak konsekuensia husi sira nia desizaun no dedikasaun ba servisu ne’ebé sira halo ba ema seluk ne’ebé presiza joven sira nia tulun.

“Iha uma na’in balu simu ami ho diak no ajuda ami hodi hamós sira nia uma, balu fo biskuit ba ami hodi aguenta hamó sira nia uma no ami kontente tebtebes,” Rodrigues haktuir.

Atitude no áktu apresiasaun sira ne’e fo ba Rodrigues no nia kolega sira korajen no espíritu atu fo servisu no haksolok liu tan. Hafoin serbisu hamutuk loron tomak ajuda maluk afetadu sira ne’ebé mak presiza tulun, Rodrigues no nia maluk voluntariu sira fila ba uma, haksolok hamutuk ho sira nia familia, maske sira rasik enfrenta hela difikuldade.

Alen de dezafiu no problema sira ne’ebé mak voluntariu PAJ sira nian hasoru iha terenu, problema boot ne’ebé sira tenki kuidadu mak situasaun pandemia COVID-19. Hanesan estudante, Rodrigues mós tenki kumpri nafatin ninia dever hanesan estudante hodi kontinua ninia estudu. Durante serka sanitaria ne’e sira simu materia balu hosi dosente uza plataforma online Easy Study hodi download traballu sira. Rodrigues lahare ninia serbisu iha PAJ bele impede fali ninia estudus tan nia bele jere ninia tempu ba nia an no ba tulun ema seluk.

Hatan ba pergunta se Rodrigues sei fila ba hela nafatin iha Tasi-tolu, Rodrigues hatete katak kuandu bé maran ona sira tenki fila ba sira nia hela fatin. Agora dadauk sei hela ho familia hodi hein Estadu nia desizaun tanba fatin refere amiasa duni ba sira iha tempu udan.

“Ha’u tuir deit bin sira, kuandu deside muda hela fatin ami tenki muda no ita tenki kumpri desizaun hosi Estadu,” Rodrigues hatete ho haraik an.

Rodrigues hatutan hodi konta nia experiensia voluntariu iha PAJ no nia sente saida mak nia halo ajuda duni sira ne’ebe kbiit laek.

“Hau serbisu hamutuk ho joven sira seluk iha PAJ no ida ne’e haboot hau nia espíritu voluntarismu. Servisu sira ne’e halo hau hakarak atu bele ajuda nafatin ema seluk, liuliu ba sira ne’ebé kbiit lato’o hodi liberta-an husi situasaun dezastre natural, liliu ferik katuas sira, inan faluk sira, ema moris ho defisiensia sira ne’ebé afetadu husi dezastre naturais. Tanba ne’e ha’u husu ba joven sira atu labele tuur nonok hodi asiste deit ema seluk nia sofrementu, maibé se ita bele tulun sira, diakliu ajuda tiha deit,” Rodrigues hatete.

Loron 4 fulan Abril, dezastre natural akontese no fo terus ba ema barak. Hahu kedas iha loron-6 fulan-Abril tinan-2021, wainhira Sekretaria Estadu Juventude no Desportu (SEJD) hamutuk ho ninia parseiru organizasaun juventude sira harii Posku Asaun Juventude (PAJ) ho objetivu atu hatan ba situasaun estragus ne’ebé mosu hafoin kalamidade klimátika, Siklone Tropikal Seroja, lori mai Dili no munisipiu balu seluk, joven atus ida resin mai halibur hamutuk hodi hala’o asaun solidariedade liu husi serbisu voluntariu ba hamós komunidade afetadu sira nia uma, fasilidade públiku sira no mós distribui apoiu humanitaria ba komunidade sira ne’ebé presiza tulun.

Rodrigues ho nia kolega voluntariu sira iha PAJ tulun malu (Foto: SEJD)

Iha PAJ Rodrigues la mesak, nia halo servisu humanitarian ho joven sira seluk. Joven sira ne’ebé hala’o serbisu iha PAJ nia mahon, mai husi SEJD nia parseiru sira hanesan; Joven Hadomi Natureza (JHN), Asosiasaun Parlamentu Foin-Sa’e Timor-Leste (APFTL), Uniaun Nasional Eskuteirus Timor-Leste (UNETL), Konsellu Nasional Juventude Timor-Leste (CNJTL), Cruz Vermella Timor-Leste (CVTL), Asosiasaun Defisiensia Timor-Leste (ADTL), Estudante Hadomi Natureza UNTL (ESHANA-UNTL) Comoro Child and Youth Center (CCYC) Aliansa Nasional Kontrolu Tabaku (ANCT) no Centru Juventude Becora no mós joven sira ne’ebé la afilia ba organizasaun hirak ne’e.

Mai mós hala’o serbisu iha PAJ nia mahon mak juventude atus ba atus husi organizasaun arte marsial PSHT, IKS-PTL, KORK no arte ritual seti-seti.

Atividade sira ne’ebé Joven sira PAJ nian hala’o lorloron mak; hala’o avaliasaun ka assessment ba kondisaun komunidade afetadu sira nia hela fatin, kondisaun fasilidade públiku sira hanesan estrada no valeta sira ne’ebé presiza atu hamós no identifika no avalia komunidade sira ne’ebé mak presiza apoiu humanitaria, hala’o serbisu hamós komunidade sira nia hela fatin no fasilidade públiku sira, no mós halo distribuisaun apoiu humanitaria ba familia sira ne’ebé ekipa assessment determina ona katak presiza hetan apoiu.

Print Friendly, PDF & Email

LEAVE A REPLY

Please enter your comment!
Please enter your name here