Reportajen Joselina dos Santos
Prezidente Komisaun Nasionál Eleisaun (CNE), Jose Belo husu ba kandidatu Prezidente Republika sira tenke respeita kalendáriu ne’ebé sira hato’o ona, tanba sira halo mini kampaña, laiha aprovasaun husi CNE, tuir Polisia ho CNE nia observasaun dalaruma akompañamentu ne’e sai mos difikuldade ba ema hotu.
Iha komunidade imprensa Prezidente CNE, Jose Belo hateten situasaun ne’ebé mosu iha Baucau ne’e, tanba sira falta respeita ba kalendariu ne’ebe sira hato’o ona, no mos koordenasaun entre kandidatu nian liu-liu ekipa sira iha munisípiu, tanba ne’e tenke koordena mos sira nia ekipa iha nasional, atu nune’e iha kalendáriu ne’ebe reajusta no koiñesentu hanesan atu labele halo ida-idak ninian.
“Ami husu ba parte PNTL tenke hola medidas, karik sira ruma ne’ebe haree ka la respeita ba lei hamutuk nafatin atu bele apoiu antes, mais hato’o nafatin ba kandidatu sira enjeral la’o di’ak iha tempu ida ne’e, maibe buat kiik sira ne’e sai mos problema ba ema hotu, tanba eleisaun la’os ita mak haree mesak, maibe iha sosiedade internasionál sira mos asesu tanba ne’e tenke hatudu imajen ne’ebe furak no lori Timor ba mundu,” dehan, Prezidente CNE iha Komunikadu Imprensa ba Jornalista sira iha Sala Media Center CNE Kolmera, 07/03.
Prezidente husu ba kandidatu sira nafatin iha konsiderasaun ba ekipa sira hotu, atu servisu nafatin hamutuk CNE ho Seguransa atu nune’e bele asegura sira nia eleisaun.
“Pontu hirak ne’e mak CNE presiza fo sai liu-liu ba ekipa sira ne’ebe daudaun ne’e la’o hela, husu atu fiar nafatin saida mak sira kometimentu asinatura faktu ne’e, la’os asina deit mais kometimentu atu halo tuir regra sira ne’ebe estabelese ona,” Prezidente CNE konklui
