Home Notisia PR Sei Enkontru ho KE no KSDS Hodi Rona Hanoin Pedidu Renovasaun...

PR Sei Enkontru ho KE no KSDS Hodi Rona Hanoin Pedidu Renovasaun EE

304
0
Enkontru entre PR ho Konsellu Estadu. [Foto: Copyright Media PR | 24.03.2020]

Reportazen Santina Lucia da Costa

Prezidente Repúblika, Dr.Francisco Guterres Lú Olo,  sei halo reuniaun ho Konsellu Estadu (KE) no Konsellu Superior Defeza no Seguransa (KSDS), hodi rona hanoin sira kona-ba pedidu renovasaun Estadu Emerjénsia (EE) husi governu.

 Liuhus komunikadu imprensa ne’ebe Neon Metin asesu husi Casa Sivil palasiu prezidensial informa katak Prezidente Repúblika sei konsulta ho Konsellu Estadu no Konsellu Superior Defeza no Seguransa, atu rona hanoin ida-idak husi orgaun konsultivu ne’e kona-ba renovasaun estadu emerjénsia, tuir artigu 85,  alínea g)  Konstituisaun RDTL.

Reuniaun Konsellu Estadu nian sei hala’o loron 31 Agostu, tuku 9.30 no Konsellu Superior Defeza no Seguransa, iha loron 1 Septembru tuku 9.30 iha Palásiu Prezidénsial Nicolau Lobato.

Governu propoin renovasaun estadu emerjénsia ba períodu loron tolu-nulu (30) no estadu emerjénsia ne’ebé Prezidente Repúblika dekreta, iha 5 Agostu ba periódu loron tolu-nulu (30), hahú husi 6 Agostu sei remata iha 4 Septembru 2020. 

Liu hosi komunikadu imprensa esplika katak estadu emerjénsia signifika katak sei iha medidas ne’ebé limita ka suspende direitu balun, liberdade balun no garantias balun ne’ebé Konstituisaun fó ba sidadaun ida-idak. Governu hanoin katak ho medidas sira ne’e mak bele kombate no hamenus moras ne’e daet husi ema ba ema, iha Timor-Leste.

“Hafoin rona ona opiniaun husi  membrus Konsellu Superior Defeza no Seguransa no Konsellu Estadu no haree katak presiza halo duni renovasaun Estadu Emerjénsia,   Prezidente Repúblika sei husu autorizasaun husi Parlamentu Nasionál, liuhusi  Mensájen ida. Karik Parlamentu Nasionál aprova, Prezidente Repúblika sei dekreta renovasaun Estadu Emerjénsia liuhusi Dekretu Prezidensiál.” informa liu husi Casa Sivil liu hosi komunikadu Imprensa loron, 30/08.

Membru  sira ne’ebé hola parte iha Konsellu Estadu mak Prezidente Repúblika, Dr. Francisco Guterres Lú Olo, Eis-Prezidente Repúblika Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes.  Halo parte mós Konsellu ne’e  membru sira nomeadu husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.

Entretantu membru sira ne’ebé hola parte iha Konsellu Superior Defeza no Seguransa mak Prezidente Repúblika. Dr. Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun, Maria Adalzija Magno, Ministru Defeza Filomeno Paixão, Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano. Halo mós parte iha Konsellu ne’e, membru sira nomeadu  husi Parlamentu Nasionál hanesan Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak José Manuel Fernandes ‘Nakfilak’ no Cristina da Silva.

LEAVE A REPLY

Please enter your comment!
Please enter your name here