Home Notisia CNE Sei Fó Sansaun Ba Grupu Ka Militante Partidu Balun Ne’ebé Impede...

CNE Sei Fó Sansaun Ba Grupu Ka Militante Partidu Balun Ne’ebé Impede Kampaña Partidu Seluk

303
0
Prezidente Komisaun Nasionál Elisoens (CNE), José Agustinho Belo. [Foto: Arma | 05.03.2022]

Reportajen Joselina dos Santos

Komisaun Nasionál Eleisaun (CNE), sei fo sansaun legal ba indivíduu ka grupu ou militante partidu balun ne’ebe mak impede kampaña partidu sira seluk  nian.

Iha konferénsia imprensa Prezidente Komisaun Nasionál Eleisaun (CNE), Jose Belo hateten relasiona ba kazu militante Partidu FRETILIN, ne’ebe mak impede kampaña Partidu CNRT iha munisípiu Manufahi, CNE simu ona informasaun no sira kontaktu kedas Diretora CNE no Komandante Polisia iha Manufahi, maibe momentu keixa ne’e seidauk to’o iha CNE nia liman.

“Ha’u apela nafatin katak laiha Sidadaun ka grupu ida mak bele hapara ema seluk nia kampaña, maibe presiza mos hatene ba oras no tempu ne’ebe sira atu halo kampaña, karik perturbasaun ka  iha problema ki’ik sira ne’e la’os mai husi ekipa kandidatu deit, maibe apoiante sira balun mak la respeita kona-ba situasaun ne’ebe loloos  sira halo,” dehan, Prezidente CNE Jose Belo ba Jornalista sira iha Sala Media Center CNE Kolmera, 07/03.

Nia dehan bazeia ba kazu hirak ne’e, CNE iha sansaun legal mak regulamentu ka lei sira, katak krime ne’e  iha lei própriu atu haree no hare keixa, reklamasaun sei la’o tuir ida ne’e, no sansaun solidariedade katak atitude ka komportamentu  sira ne’ebe hatudu ne’e influensia ba eleitór sira atu bele deside buat ruma.

“Iha mos sansaun kona-ba natureza katak durante  ne’e halo mos ritual ne’ebe la’os sente kedas agora,  maibe se ema ruma ne’ebe perturba no hanoin la tuir rezultadu ritual ninian ne’e sansaun ida ne’ebe sira sei lori konsekuénsia rasik,” nia informa.

Prezidente CNE apela ba sira katak atu situasaun sira ne’e la’o ho di’ak, husu ba kandidatu sira tenke respeita paktu, ne’ebé asina ho rezultadu ne’ebé halo ona, tanba kampaña ne’e la’os mai atu sobu malu no fahe malu maibe kampaña ne’e halo ema atu unidu liu tan ba Timor nia di’ak.

“Se prinsípiu ida ne’e mak sira opta, ha’u hanoin problema ki’ik sira hanesan ne’e laiha, mais ha’u fiar metin katak ne’e la’os orientasaun mai husi kandidatu sira, maibe karik estrutura ruma ho apoiante sira iha kraik mak falta responsabilidade no kumprimentu ba lei, ida ne’e mak provoka  hodi hamosu situasaun, maibe ita sei hamutuk ho Kandidatu sira hodi resolve problema hirak ne’e,” dehan Prezidente CNE

Nia konklui evita problema hirak ne’e, CNE haruka ona karta ba kandidatu hotu atu tau nafatin atensaun ba prosesu tomak tan foin to’o loron 5, loron tuir mai sei barak di’ak liu evita la’os deit kampaña, maibe durante kampaña linguajen apoiante sira liu-liu ba ekipa susesu responsavel tenke orienta sira nia ema atu respeita situasaun, se la’e situasaun sira ne’e bele estragu kandidatu sira nia imajen.

Print Friendly, PDF & Email

LEAVE A REPLY

Please enter your comment!
Please enter your name here