Reportajen David da Costa Gusmao
Partidu Kongresu Nasionál Rekonstrusaun Timorense (CNRT) ofisialamente ohin lori sira nian kandidatura José Ramos Horta ba rejistu ona iha Tribunàl Rekursu, hodi konkore ba iha Eleisaun Prezidnsiàl períodu 2022-2027.
“Ami lori prosesu aprezentasaun kandidatura Dr. José Ramos Horta nian, mai entrega ba Supremu Tribunál ba Justisa (STJ), sobre ami nia partispasaun iha eleisaun 19 Marsu 2022”, Koordenadór Jerál Ekipa Susesu kandidatura, Tomas Cabral hato’o lia hirak ne’e ba jornalista sira hafoin remata aprezentasaun dokumentus kandidatu Prezidente Repúblika 2022-2027 José Ramos Horta iha Tribunál Rekusu Dili, Kinta 27/01.
Nia hatete aprezentasaun kandidatura ba Supremu Tribunál ba Justisa ne’e basea ba artigu 15 no 17 hosi lei eleitoràl.
“Ami lori dokumentu tuir lei artigu 15 no artigu 17 katak rekolla asinatura kartaun eleitór, dokumentu hosi kandidatu nian, no representante kandidatu nian, ami mai hato’o ba Supremu Tribunál ba Justisa liuhosi Tribunàl Rekursu simu ona ami nia prosesu iha buat ruma sira sei kontaktu ami”, esplika Tomas.
Nune’e mós kandidatura José Ramos Horta hetan proponte apoiar kada munisípiu 100 apoiante, no iha nivél nasionáll iha apoiante 5.000.
Alende ida ne’e mós horseik iha loron Kuarta 26 Janeiru, kandidatura independente Ângela Freitas no Milena Pires mós rejista ona iha Tribunal Rekursu hodi hein Aprovasaun atu Kompete iha Eleisaun Prezidensiál 2022-2027.
