Home Notisia Traballador Domestika Ne’e Para Serbisu Tanba EE, Arminda: Governu Bele Tulun Ami...

Traballador Domestika Ne’e Para Serbisu Tanba EE, Arminda: Governu Bele Tulun Ami ka Lae?

276
0
Arminda Soare nudar traballador domestika. [Foto: Ato 'Lekinawa' Costa | 17.06.2020]

Reportazen Zevonia Vieira

Serbisu hahu hosi dader to’o kalan, hodi fase ropa, tein hamoos uma no halo serbisu sira seluk mak Arminda Soares nudar traballador domestika, nudar serbisu informal ne’ebe nia halao ona durante tinan ida resin.

Arminda mai hosi Munisipiu Ermera, idade 38 hodi mai hikis kosar iha Dili, atu bele hetan netik osan dollar ida, hodi nune’e bele hatutan nia moris lor-loron.

Iha loron Traballador Domestika, FONGTIL hamutuk ho Working Women’s Center Timor-Leste no APHEDA, komemora loron Traballador Domestika, hamutuk sira ne’ebe mak halao serbisu refere, hodi ezije ba governu atu kria lalais Lei Traballador Domestika, tanba sira mos iha direitu nudar traballador tuir Konstituisaun hateten.

Iha situasaun moras Corona ne’ebe mak hadaet mai Timor-Leste, halo Arminda tenke para nia serbisu no bainhira implementa Estadu Emerjensia (EE), Situasaun ida ne’e afeta tebes ba nia moris, tanba nia labele tulun nia moris lor-loron.

” Iha situasaun moras Corona ne’e, sira haruka hau deskansa tiha . Hahu hosi Corona tama Timor, nee mak halo to’o agora hau la simu osan. Osan ba Corona nian hosi governu mos sedauk ida. Hau halo serbisu iha ne’eba tama dadersan no dalaruma fila tuku 8 kalan”, konfesa Arminda ho oin nakonu ho esperansa ba Neon Metin.

Serbisu domestika ne’ebe mak Arminda halo, mak apoiu serbisu uma laran nian. Tinan ida resin ona maibe to’o ohin loron salariu sedauk sae. Arminda hetan formasaun no registu iha Working Women’s Center Timor-Leste (WWCTL), nia hetan formasaun oinsa halo serbisu uma nian ho professional, ho nune’e kontratu mos tenke halo tuir nia profesaun no esperiensia ne’ebe mak nia hetan ona. Iha kontratu laran mos esplika katak tenek hasae salario bainhira serbisu liu ona fulan 6.

“Hau serbisu iha ema nia uma, fase ropa, tein, hamoos rai no seluktan. Hau serbisu tinan ida ho balun ona, kada fulan hau simu salariu $120, desde tama to’o agora mak simu nafatin $120, sedauk sae ida”, tenik Arminda.

Arminda hatutan nia istoria katak, agora nia para serbisu, hodi hein nia patraun telefone fali nia, “agora hau deskansa hosi serbisu, patraun dehan sira telefone mak hau ba fali, entaun to’o agora hau labele hetan osan. Hau deskasan hosi 12 Abril to’o agora. Durante Corona hau iha kos deit, no hau tenke selu fulan $75.00. Momentu hau serbisu rai hela osan mak hodi selu hela Kos, maibe agora ba fulan 2 nia laran hau sedauk seluk”.

Laos kos deit mak Arminda tenke selu kada fulan, Arminda presiza nia nesediade ba han hemu nian, nudar feto nesesidade boot liu maluk mane sira. Arminda uza nia abilidade ne’ebe iha oituan, hodi suku hen aba meja nian, hodi nune’e karik ema balun interese bele sosa netik ho presu $10.00, hosi ne’e mak Arminda bele ense nia kabun no sosa buat ruma hodi rai.

Ohin loron governu liu hosi Ministeriu Saude prosesa subsidiu 40% ba traballador sira ne’ebe serbisu ba kompania no iha kontratu, hodi bele simu sira nian subsidiu, maibe maluk traballador domestika sira labele simu seguransa sosial, tanba maioria traballador domestika sira la iha kontratu no la serbisu ba kompania no sedauk hakerek iha Lei Traballador.

Situasaun ne’e halo sira vulneravel liutan, sira la ezije buat boot sekarik sira kontinua serbisu, maibe tanba Corona ho pasensia, sira husu ba governu hodi fo mos direitu ba sira, atu bele hetan subsidiu ne’e.

“Ami husu ba governu karik ami sira serbisu hanesan traballador domestika nee, bele mos hetan subsidiu ba seguransa sosial hosi Ministeriu Solidariedade, para bele ajuda netik ami nia moris, tanba impaktu hosi Corona, ami hasoru susar hodi sustenta ami nia moris”, tenik Arminda ho esperansa boot, karik governu bele rona sira nia halerik.

Tuir dadus hosi WWCTL katak iha ema nain 78 ne’ebe halo serbisu nudar traballador domestika ne’ebe hetan impaktu hosi estadu emerjensia, hapara sira hosi serbisu, tanba patraun sira mos hetan impaktu hosi situasuan refere.

WWCTL akumula ema hamutuk 218 traballador ne’ebe mak rejistu iha WWCTL, hodi sira bele hetan formasaun professional oinsa halo serbisu ho professional no sira mos iha konnesmentu konaba direitu saida deit mak sira presiza hatene no hetan.

LEAVE A REPLY

Please enter your comment!
Please enter your name here