Reportajen Joselina dos Santos
Autoridade Administradór Postu-Administrativu Lakluta, Munisipiu Viqueque husu ba kompañia manan nai’n sira, liu-liu kompañia Timorindo Unipessoal Lda no kompañia Kuapali Unipessoal Lda tenke servisu ho sériu no kumpre regra husi Prezidente Bee Timor-Leste, Empresa Públika (BTL, E.P), atu komunidade sira bele asesu ba Bee moos ho Saudavél.
“Ohin ami asina akordu kona-ba projetu bee moos ba komunidade Postu-Administrativu Lakluta, Munisipiu Vikeke, Bee moos ne’e sei dada husi Bematan Surik Lulik iha suku Dilor Vikeke Vila hodi fornese ba komunidade uma kain 693 no serve ba populasaun hamutuk 4158 iha Postu refere”, dehan Administradór Postu-Administrativu Lakluta, Munisipiu Vikeke José Andrade dos Santos hafoin Asina Akordu iha Salaun BTL, E. P Kaicoli, Tersa 10/01.
Nia haktuir akordu ida ne’e nia esperansa no lori povu Lakluta nia naran ho laran haksolok husu ba kompañia Timorindo Unipessoal Lda no kompañia Kuapali Unipessoal Lda ne’ebe asina akordu ho Bee Timor-Leste, Empresa Públika (BTL, E.P), tenke kumpri dever hodi halo servisu tuir prazu ne’ebe determina katak komesa iha hahu inisiu husi fulan janeiru to’o fulan juñu 2023, Tempu labele determinadu atu labele abandona servisu tuir orariu ne’ebe iha.
“Husi Be-matan ba to’o iha suku Dilor kuaze 3 kilometru maibe karik bee ne’e forsa to’o ba iha suku Uma Tolu entaun kuaze 10 kilometru, nune’e tenke servisu ho fuan tanba servisu ne’ebe ita halo la’os ba ema ida de’it maibe ba ita nia populasaun sira”, nia informa.
Iha fatin hanesan, Diretór Kompañia Timorindo Unipessoal Lda Jorge Henriques Dehan, sira prontu hala’o servisu akordu ne’ebe ho BTL, E.P no sei esforsu hodi realiza, maske iha dezafiu kona-ba natureza ne’ebe akontese iha dalan udan no anin boot, nune’e karik iha problema ruma sira sei Kordena malu ho Autoridade lokal sira atu bele buka solusaun hamutuk.
