Reportajen Estajiada Agustinha Amaral
Ajénsia Kooperasaun Internasional Japaun (JICA) kontinua apoiu ekipamentus laboratóriu ba Governu, liu husi Ministériu Saúde hodi hasa’e kapasidade Laboratóriu Nasional no Universidade Nasional Timor Lorosa’e (UNTL) nian.
“Ohin loraik ida ne’e, Ajénsia Kooperasaun Internasional Japaun apoiu Ekipamentus mai ita, ne’ebé apoiu ne’e la’os ohin de’it, maibé apoiu ida kontinua de’it no ita prepara halo proposta no sira hakarak atu apoiu ita iha kedas tinan 2021 bainhira Covid-19 sei iha,” Ministra Saúde, Odete Maria Freitas Belo dehan iha Palásiu Sinzas, Kaikoli, Kuarta, 11/01.
Nia hatutan, depois iha tempu hanesan, ohin sira haree katak Laboratóriu nasional ninia servisu ne’ebé mak barak liu, entaun sira mos hanoin atu haforsa mos Laboratóriu iha Laboratóriu UNTL nian.
“Iha tempu ne’eba Governu Japaun prontu atu fo apoiu ba Ministériu Saúde, espesialmente ba Laboratóriu Nasional nomos sira mos apoiu Ekipamentus ba Universidade Nasional Timor Lorosa’e nian ho mákina, ne’e mákina refere liu ba teste Covid-19 nian”, Ministra Odete informa.
Tanba ne’e ohin sira entrega tan mákina ida ne’e la’os ba espesiária, maibé bele mos halo teste ba moras seluk no teste mikrobiolonia nian hanesan teste HIV-SIDA, tuberkuluzu nomos teste ba moras sira seluk.
Mákina kuantidade sira ne’ebé maka JICA entrega no apoiu ne’e hamutuk tolu, rua ba Laboratóriu Nasional no ida fali ba Laboratoriu UNTL nian hodi halo teste PCR, teste Covid-19 no using GeneXpert.
Entretantu Embaixador Japaun iha Timor-Leste, Kimura Tetsuya aumenta tan, ohin sira suporta no apoiu ho total ne’ebé sei aloka ba ekipamentu hamutuk $100,30, no suporta ne’e haree liu-liu atu hasa’e kapasidade nasional laboratóriu ni-nian, maibé la’os ba laboratóriu de’it, maibé ba mos iha laboratóriu iha Universidade Nasional Timor Lorosa’e.
“Ami apoiu no tulun Ekipamentus sira ne’e ho objetivu atu tulun foin sa’e sira hodi aprende no hatene liutan servisu saúde ninian, nomós tuir polítika Japaun ni-nian presiza atu fó tulun ba nasaun hirak ne’ebé iha situasaun vunerável, liu-liu parte saúde nian,” nia hatete.
