Reportazen Santina Lucia da Costa
Relasiona ho komemorasaun Masakre Santa Cruz no nudar loron nasional Juventude ba dala 15 ho tema “Joven, Autor ba Harii Sosiedade Reziliente”. Liu hosi komemorasaun refere mate restu 12 Novembru 1991 lamenta ho Komisaun Organizador (KO) sira ne’ebe la prepara fatin mate restu sira tanba laiha kadeira ba sira hodi tur.
Mate restu Masakre Santa Cruz 12 Novembru 1991, Martina dos Santos ba Neon Metin hateten sente triste bainhira to’o iha fatin komemorasaun nudar espesial ida, maibe buka rasik ai-mahon hodi tur.
“Ami triste tebes kuandu ami mai to’o iha ne’e dehan espesial ida, maibe ami buka fatin iha rate laran hodi tur, buat hirak ne’e la importante, importante mak ita kontinua aniversariu ne’e lao ho di’ak.” lamenta Martina dos Santos, ba Neon Metin iha ambitu komemorasaun Masakre Santa Kruz ba dala 29 iha semiteriu Santa Cruz, 12/11.
Sentimentu hanesan mate restu Venancio Gonçalves Martins hatoo katak ba futuru komisaun organizador tenki koordena didi’ak ho mate restu Masakre Santa Cruz 12 Novembru 1991, atu nune’e bele prepara hetan fatin ho dignu.
“Ba futuru se bele komisaun organizador sira tenki koordena ho sobreviventes Masakre Santa Cruz para Sobreviventes sira bele hetan fatin ho dignu, maibe ida ne’e parese falta koordenasaun, mais ba oin ita tenki hamutuk hadia di’ak liu tan”, dehan, Venancio Gonçalves Martins.
Iha parte sorin Neon Metin halo konfirmasaun ho Prezidente Komisaun Organizador, Zaulino Gomes da Silva hateten Komisaun organizadora prepara fatin ba sobrevivente sira katak prepara kadera 1000 maibe ema ne’ebe ba barak liu tiha numeru ne’ebe komisaun prepara.
“Laos katak ita la prepara, ita prepara maibe ema mak barak, sira hirak ne’ebe tuur iha tenda, ne’ebe ita prepara ba maluk sobrevivente sira ne’e, ne’e inklui mos familia sobrevivente no sobrevivente balun”, hateten Prezidente Komisaun Organizador, Zaulino via telefone, 13/11.
Nia hatutan iha maluk sobrevivente sira, ne’ebe komisaun organizador konvida, atu ba tur antes nai Prezidente Republika to’o iha Semeteiru Santa Cruz, maibe sira rasik mak lakohi atu ba tur iha tenda laran.
Tuir Zaulino katak kompara ho tinan kotuk, komisaun organizador sira prepara deit kadera total 500 no tinan ida ne’e sae ba 1000.
Tuir observasaun Neon Metin maske loron manas no tiru makaas maibe sobr viventes masakre Santa Cruz 12 Novembru 1991 la senti kolen, kontinua hamriik firme hodi akompanha serimonia husi inisiu to’o remata
Iha komemorasaun ne’e hetan partisipasaun hosi estudantes, grupu juventude sira, membru governu, parlamentu no mate restu 12 Novembru sira.
