Reportazen Francisco JDA
“Husu nafatin governu tenki harii ona monumentu Masakre Santa Cruz, sai memória akontesimentu trajédia ne’eba iha fatin lulik ida ne’e, kleur demais ona mesmu governu hira mak troka malu“. Prezidente Komite 12 Novembru
Juventude loriku As’wain hatudu ona sira kontribuisaun ba ukun rasik-an, ne’ebe rezulta joven lubun ida mak tenke hakotu sira nia vida iha tropas Indonesia liman fatin. Iha komemorasaun Masakre Santa Cruz ba dala 29 no loron nasional Juventude ba dala 15.
Liu hosi diskursu ofisial, Prezidente Comite 12 Novembru, Gregorio Saldanha “Mouris” hatete presiza hateke ba kotuk, hodi halo refleksaun atu hetan fali kbiit, hodi hakat ba oin no kaer metin nafatin valores no prinsípiu sira hodi manan funun.
“Husu nafatin governu tenki harii ona monumentu Masakre Santa Cruz, sai memória akontesimentu trajédia ne’eba iha fatin lulik ida ne’e, kleur demais ona mesmu governu hira mak troka malu, maibe fatin ne’e seidauk troka buat ida, husu mos governu atu kumpre nia promesa hodi troka naran jardim 12 Novembru Motael, ba jardim Sebastiaun Gomes hodi evita negasaun fatin historikus, mesmu Sebastiaun mesak mate provoka reasaun soliedarioedade amizade, barak tebes mak mate no istorkus ne’e ita labele nega”, hateten Presidente Comite 12 Novemru Gregorio Saldanha iha komemorasaun Masakre Santa Cruz, 12/11
Gregorio Saldanha husu timoroan hotu tenki halo tuir no kumpre leis iha Timor-Leste, luiliu lei inan Konstituisaun Repúblika, husu joven sira atu badinas eskola, badinas servisu no respeita malu liuliu ema seluk ne’ebe otas boot liu imi, tenki hahú moris ho ambiente foun ne’ebe nakonu ho toleránsia respeita malu, domin, soliedariedade no unidade.
Iha fatin hanesan família sobreviventes Saudozu, Venancio Fonseca, Alfonita da Resoricao ba Neon Metin hatete katak loron ohin importante tebes, atu relembra fila fali sira nia sofrementu no terus durante manifestaun 12 Novembru, maske iha tempu ne’eba sira tauk maibé sira nafatin brani atu luta ba ukun rasik-an.
“Hau nudár familia ba sobrevivente hakarak ezije ba governu bele halo monumentu ne’e lalais, tanba ida ne’e sai hanesan mos identidade nasaun nian, joven sira iha 12 Novembru mos hola parte ba indepensia nasional”, hateten familia sobrevivente Alfonita da Resoricao
Alfonita husu governu se posivelmente bele fo bolsa ba família sobreviventes nia oan, tanba sira lakon inan no aman iha tempu defisil, karik balun hetan ona, maibe balun sedauk tanba sira nia inan-aman mos luta ba rai ida ne’e.
