Reporajen Santina Lucia da Costa
Kampaña loron Daruak iha Suai, Kandidatu Prezidente Republika ho Numeru sorteiu 2, Dr. Francisco Guterres Lú Olo, ho ninia komprimisu politika ba povu Covalima katak, sai Xefe Estadu kumpre nia devér, garante paz, estabilidade iha Timor-Leste hala’o dezenvolvimentu sustentável, labele iha tan krize beibeik, rai ida ne’e tenke hakmatek, atu lorosa’e ka loromonu ita rai ida de’it.
Kandidatu Prezidente Republika ho Numeru sorteiu 2, Lú Olo hateten Prezidente Republika ida hanesan Xefe Estadu hakarak garante páz no estabilidade iha ita nia rai, atu rai ida ne’e labele iha tan krizi beibeik, rai ida ne’e tenki hakmatek, rai ida ne’e nia-oan atu lorosa’e ka loro monu,ita hotu-hotu rai ida ne’e nia-oan.
Lú Olo hatutan, ita hotu halo istória ida hamutuk iha funu ida naruk nia laran, husik ita nia matan-been, ita lakon ita nia família, ita hamutuk para atu mai halo ema ida de’it, halo rai ida de’it, halo povu ida de’it para hodi bele hakmatek iha ita nia rain, hodi hala’o dezenvolvimentu iha ita nia rai atu hadia povu ida ne’e nia moris.
“Tinan barak ita ukun-an, maibé buat barak sei hein hela ita para atu bele hadia, para atu bele halo, hau kompremete hau nia-an karik hau eleitu tan ba Prezidente Republika, hau sei hamutuk ho orgaun sira seluk para kumpri dala ida tan hau nia dever hodi garante paz estabilidade no atu hala’o dezenvolvimentu ida sustentavél ba ita nia rai.” Hateten, Kandidatu PR, Francisco Guterres Lú Olo, iha Komisiu Suai, Munisipiu Covalima, Domingo, 3/4.
