Reportajen David da Costa Gusmao
Embaixadór Australia ba Timor-Leste, Bill Costello informa programa bolsa da mãe jerasaun foun, governu Australia apoiu osan 5 milloens ba governu Timor-Leste, atu hala’o programa bolsa da mãe ba jerasaun foun.
Programa bolsa da mãe jerasaun foun ne’e apoiu osan ba inan no labarik sira sei ki’ik, atu reforsa família sira, hodi bele fó nutrisaun ne’ebé diak ba sira, no ba nia oan no ba labarik sira ne’ebé kiik.
“Programa ne’ebé importante ohin ami diskute, maka programa ida naran bolsa da mãe jerasaun foun. Atu apoiu osan ba inan no labarik sira sei kiik. No atu hala’o programa ida ne’e, insiu governu Australia fornese tokon 7 dollar Australia nian, mas ita sura ba iha dollar Amerika nian sei to’o 5 milloens,” Dehan Embaixadór Australia, Bill, Bainhira ramata sorumutu ho Vise-Primeira Ministra no Ministra Solidariedade Sosiál no Inkluzaun, Armanda Berta iha Sala reuniaun (G-VPM-MSSI) kaikoli, Díli, Segunda 4/04.
Nia haktuir daudaun ne’e tekniku sira serbisu makaas tebes ho MSSI, atu haree oinsa inan sira bele asesu ba osan, hanesan oinsa sira bele ba rejistu no oinsa sira bele hetan pagamentu, ho ida ne’e governu Australia apoiu mos tekniku hodi apoiu ba iha programa ida ne’e.
” Programa ne’e bele lansa iha meiu tinan ida ne’e. No programa ne sei hahú iha munisipiu tolu maka Ainaro, Bobonaru no RAEOA. Mas Programa ida ne’e sai hanesan pilotu ida, bainhira programa ne’e diak ita sei kontinua iha munisipiu sira hothotu,” Tenik nia.
Iha fatin hanesan Primeira Ministra Interina atuál, Vise-Primeira Ministra no Ministra Solidariedade Sosiál no Inkluzaun, Armanda Berta dos Santos, setor sosial hili nu’udar exemplar ba setor sira seluk bazeia ba mekanizmu ne’ebé uza ho entidades sira, mais koordenadu no estruturadu kompara ho setór seluk.
“Hato’o apresiasaun profunda ba suporta ne’ebé durante ne’e Governu Australia oferese mai Governu Timor-Leste. Governante ne’e agradese ba governu Australia”, dehan Armanda Berta
Nune’e mos goverante ne’e agradese ba programa Bolsa da Mãe Jerasaun Foun, tanba programa ne’e nu’udar investimentu di’ak ba iha futuru.
