Reportajen Silvino Freitas
Programa Toos-Eskolár ne’ebé mak implementa husi Permakultura Timor-Leste (PERMATIL), hasoru dezafiu-tékniku no persepsaun-negativa husi inan-aman, ne’ebé mak fó impaktu negativu ba implementasaun programa refere.
Tuir responsabilidade toos-eskolar, Herminia de Jesus Pinto haktuir, programa toos-eskolar ne’e programa ne’ebé implementa husi PERMATIL, ne’ebé tama kurríkulu eskolár liu-liu iha ensinu báziku primeiru no segundu siklu.
“Toos eskolár ne’e hahú tama iha ita nia kurríkulu nasionál iha tinan 2013, hamutuk iha dixiplina arte-kultura nian, ho naran Unidade Toos Eskolár” dehan Responsavel Programa Toos-Eskolar PERMATIL Herminia de Jesus Pinto liu husi media-briefing iha sede HASATIL Farol, 10/12.
Entretantu responsavel ne’e mos lamenta ho dezafiu tékniku sira ne’ebé mak durante ne’e hasoru iha implementasaun programa toos-eskolár.
“Dezafiu sira ne’ebé mak ami hasoru mak dezafiu tekniku, mak asesu ba bee-mos, animal estraga no mos ita nia manorin sira mos la dún hetan informasaun livru balun liga ho implementasaun toos eskolar ne’e rasik, inklui mos diresaun nasional ensinu baziku nian la dún tau atensaun ba implementasaun programa ne’e rasik, serake diresaun ne’e rasik mak hetan benefisiu husi programatoos-eskolar” nia lamenta.
Nia fundamenta tan katak dala barak hamosu presepsaun ne’ebé mak sala, ba programa ne’e rasik, manorin na’in sira halo produsaun ho eskala boot, kuaze produtu ne’e apoiu ba merenda eskolár, entaun inan-aman balun deskontente ho programa toos-eskolár, sira hanoin katak ita esplora sira nia oan sira ba iha implementasaun, programa ne’e nia objetivu prinsipál mak labarik sira atu aprende.
“Iha mos estratéjia seluk, durante ne’e ami iha de’it eskola públiku, maibe daudaun ne’e ami hahú ona implementa mós iha eskola privadu balun, no mós kolabora ona ho eskola sekundáriu sira, tanba antes ne’e ami implementa de’it iha eskola ensinu báziku” nia hakotu.
