Reportajen Umbelina dos Reis
Sekretáriu Estadu Formasaun Profisionál no Empregu (SEFOPE), liuhosi Diresaun Nasional Relasaun Traballu (DNRT), realiza atividade doasaun ran hodi selebra loron mundial ba traballadór sira nian ho tema “Harii futuru ne’ebé di’ak liu ba traballadores sira hotu no kria mundu traballu ne’ebé valorizadu, protejidu no hetan oportunidade ba moris”.
Diretor Jerál SEFOPE, Carlito do Rosário Cabral hateten, kada tinan ita sempre selebra loron mundial ba traballadór sira nian, nune’e ohin loron ita realiza doasaun ran turuk ida hodi ajuda fali ema lubuk ne’ebé moras iha ospital hodi salva sira nia vida.
“SEFOPE liuhosi DNRT organiza dosaun ran nune’e bele kontribui hodi salva maluk sira ne’ebé moras no presiza ran iha ospital hodi salva sira nia vida.” Dehan Diretor Jerál, Carlito do Rosário Cabral, ba Jornalista sira iha salaun SEFOPE Kaikoli, segunda-feira, 29/04.
Nia dehan, doasaun ran ne’e mai hosi empregadór, traballadór, kompañia, bombeiros no funsionáriu SEFOPE rasik tanba doasaun ran ne’e ho karakter voluntáriu.
“Ema ne’ebé kandidata ba doasaun ran ne’e SEFOPE target kuaze na’in 150 resin, maibé mediku sei fó teste ba kandidatu sira hafoin halo doasaun tanba dala-ruma ita ema ne’e saúde balun ladun saudavel.” Nia dehan.
Iha parte hanesan, Diretor Nasional Relasaun Traballu (DNRT), Angelo dos Santos Velosolu, hatutan objetivu hosi doasaun ran ne’e atu priense komemorasaun loron mundial ba traballadores sira nian.
“Ha’u apresia tebes ba ita hotu ne’ebé partsipa iha doasaun ran ne’e tanba liuhosi doasaun ran ne’e bele tulun maluk sira ne’ebé moras no presiza ran turuk ida bele salva ema nia vida.” Nia dehan.
Kritéria ba doasaun ran presiza saúde di’ak, deskansa normal oras 8 antes halo doasaun ran. Idade 18-60, todan 45 kg ba leten, tensaun systolic 110-150 mmHg, distolic 60-90 mmHg. Hemoglobina mane/feto 12,5gr/%. Espesífiku ba feto la ho kondisaun menstruasaun, se karik post loron 7, la ho kondisaun isin rua (pregnancy), la ho kondisaun fó susu ba bebe.
