Reportajen David da Costa Gusmao
Kmanek Haburas Unidade Nasionál Timoroan (KHUNTO) ohin rejistu nian kandidatura Armanda Berta dos Santos, iha Tribunál Rekursu (TR), hodi konkorre iha eleisaun Prezidensiál 2022-2027, maibe Tribunal Rekursu haruka fila dokumentu tanba seidauk prenxe rekizitu.
“Ohin ami seidauk rejistu ami nia kandidatura Armanda Berta dos Santos tanba Tribunàl husu ami hodi kompelta dokumentus balun”, Prezidente ekipa susesu Nasionál kandidatura PR 2022-2027 Armanda Berta dos Santos, Marito Magno ba jornalista sira hafoin remata aprezenta kandidatura Armanda Berta iha Trinunàl Rekursu, Kaikoli Sexta 28/01.
Nia haktuir Tribunàl haruka fila dokumentu kandidatu Armanda Berta, tanba dokumentu lista apoiante ne’ebé ekipa susesu lori mai hodi aprezenta ba Tribunàl Rekursu ne’e manual deit, maibe tribunal presiza kompleta dokumentu eletróniku
“Dokumentu ohin mai manuàl ka hard copy, maibé tribunàl prezisa maka dokumentu eletróniku ka soff copy, tanba ne’e mak haruka fila dokumentus sira, no agora ami esforsu hela atu kompleta fali dokumentus apoiante sira ne’e ba iha eletróniku ka soff copy no iha tuku 15:00 loraik ami mai fali rejistu”, dehan Marito Magno.
Prezidente Ekipa Susesu Kandidata PR Armanda Berta hateten, Armanda Berta dos Santos kandidata aan ba Prezidente Repúblka ho forsa polítika apoiante hamutuk 8.641, hosi apoiante 13 munisípiu inklui Rejiaun Administrativu Espesiàl Oecusse Ambeno (RAEOA).
“Proponete husi kada munisipiu KHUNTO hetan, iha Dili 1.470, Manatuto 804, Ermera 801, Baucau 742, Liquiça 612, RAEOA, 599, Aileu 570, Manufahi 507, Viqueque 476, Bobonaro 447, Covalima 493, Lautem 404, Ainaro 588, Atauro 140,” nia esplika.
Prezidente Ekipa Susesu Nasionál Armanda Berta iha esperansa bo’ot lori sira nian kandidatura PR Armanda Berta manan iha eleisaun Prezidensiàl tinan ne’e.
“Ami ekipa susesu ba Ita nian kandidatura Armanda Berta dos Santos, ami iha espera katak nian kandidatura sei hetan rezultadu pozitivu no sei fó supreza ba povu timor laran tomak”, nia dehan
