Home Notisia Ajensia ONU Haat no KOICA Apoiu Projetu Hamutuk Ba Igualdade Responde...

Ajensia ONU Haat no KOICA Apoiu Projetu Hamutuk Ba Igualdade Responde Ba VBJ

277
0
Ajensia haat ONU, KOICA no SEII asina akordu hamutuk. [Foto: Media SEII | 24.11.2020]

Reportazen Zevonia Vieira

Ajénsia haat Nasõens Unidas hanesan UN Women, UNDP, UNFPA no IOM liuhusi fundu jenerozu Korean International Cooperation Agency (KOICA) iha Timor-Leste halibur hamutuk, hodi hametin esforsu ba feto no labarik-feto sira iha Timor-Leste, atu bele goza sira-nia direitu, hodi moris livre husi violénsia bazeia ba jéneru no bele hetan asesu ba atendimentu esensiál ne’ebé ho kualidade.

Liu hosi komunikadu imprensa ne’ebe Neon Metin asesu esplika katak projetu tinan haat ho kustu $7.7 millaun  ho naran “Hamutuk ba Igualdade: Prevene no Responde ba Violénsia Bazeia ba Jéneru (VBJ) iha Timor-Leste” suporta Timor-Leste nian implementasaun ba Planu Asaun Nasionál ba Violénsia Bazeia ba Jéneru, lidera husi Sekretária Estadu ba Igualdade no Inkluzaun (SEII).

Iha komunidade imprensa hatutan katak parseria ne’e sei kolabora hamutuk ho SEII, ministériu importante no organizasaun sosiedade sivíl sira, atu serbisu ba prevene violénsia bazeia ba jéneru, fasilita suporta ba atendimentu esensiál ba saúde no justisa, hametin monitorizasaun no relata violénsia iha fatin públiku no fatin privadu no responde ba violénsia bazeia ba jéneru, iha kontestu hamenus risku ba dezastre.

Projetu refere asina ona iha loron 24/11 no sei atinji maizumenus benifisiáriu 200,000 direta iha munisipiu tolu  hanesan Dili, Baucau no Covalima no Rejiaun Administrativa Espesiál Oécusse no Ambeno (RAEOA), komplementa inisiativu seluk indiretamente atu atinji no fó benefísiu ba populasaun Timor-Leste tomak.

Iha seremonia asina akordu refere, Direitor Nasional KOICA Timor-Leste, Sikhyon Kim hateten asina ona preparativu ne’e ho ajénsia Nasõens Unidas sira atu kombate violénsia bazeia ba jéneru iha Timor-Leste ho komemorasaun ba loron internasionál ba Eliminasaun Violénsia ba Feto.

“Violénsia nunka bele justifika no hau espera katak “Hamutuk ba Igualdade” sei ajuda redus violénsia bazeia ba jéneru no fó kbít ba mane ho feto sira atu halo advokasia ba igualdade jéneru”, dehan Direitor Nasional KOICA Timor-Leste.

KOICA sai hanesan Ajénsia Govermentál ne’ebé suporta Timor-Leste atu atinji Objetivu Dezenvolvimentu Sustentavel sira. Projetu ida ne’e suporta diretamente KOICA nia Inisiativa superioridade global“Taka Lakuna” suporta nasaun sira atu atinji alvu ba ODS 5 ba igualdade jéneru. Iha Timor-Leste, KOICA halo ona parseria hamutuk ho ONU liuhusi projeitu oi-oin atu suporta dezenvolvimentu nasaun nian.

Iha fatin hanesan Sekretária Estadu ba Igualdade no Inkluzaun, Maria José da Fonseca Monteiro de Jesus iha nia abertura afirma katak violénsia kontra feto no labarik-feto sira sei nafatin sai problema boot ida iha Timor-Leste, no la’ós esforsu ida-ne’ebé fasil iha mundu tomak.

Nia dehan mesmu instituisaun governu barak hamutuk ho parseiru sira halo ona esforsu kolaborativu ne’ebé di’ak, maibe iha semana tolu kotuk ba, ita nafatin haree no rona kazu barak iha nasaun laran.

“Ho suporta adisionál husi Governu Korea, sei sai hanesan suporta boot ida atu komplementa governu nia esforsu sira ba luta hasoru VBJ. Ami nafatin halo advokasia ho liña ministériu hotu wainhira halo advokasia ba jéneru no ba liña ministériu hotu atu asegura orsamentu estadu ne’ebé sensivel ba jéneru,” dehan Sekretaria Estadu Maria José de Jesus.

Xefe Edifisiu UN Women, Sunita Caminha ne’ebe reprezenya ajensia haat ONU hateten hamutuk ba Igualdade sei halibur espesialista no papél husi Instituisaun Governu Timor-Leste sira, ajénsia haat ONU nian UN Women, UNDP, UNFPA no IOM no KOICA.

“Ida-ne’e harii tanba ita-nia forsa koletivu hanesan parseiru atu responde ba asuntu sira ne’ebé konetadu ba violénsia iha uma-laran, asédiu seksuál no violénsia iha fatin públiku no mós ho violénsia bazeia ba jéneru iha kontestu dezastre nian”, hatete Sunita Camina.

Projetu ne’e sei uza maneira sira ne’ebé efetivu, atu prevene violénsia bazeia ba jéneru molok akontese. Ida-ne’e sei to’o individu sira, inklui joven no grupu sira ne’ebé hasoru diskriminasaun bebeik no suporta família no komunidade sira, atu hetan koñesimentu no abilidade atu sai ajente ba mudansa no hamriik hasoru asédiu seksuál no forma seluk ba violénsia bazeia ba jéneru.

Projetu ne’e sei suporta instituisaun sira atu habelar sira-nia servisu no hadi’ak kualidade ba atendimentu esensiál sira, bele to’o liután ba sobrevivente ba violénsia sira atu enkoraja ema seluk (sobrevivente) hodi buka suporta. Ida-ne’e sei kontribui atu hadi’ak liután monitorizasaun no akuntabilidade atu interpreta komitmentu sira  iha papél ba asaun prátika, servisu ho sosiedade sivíl no governu, no envolve média no públiku jerál.

Print Friendly, PDF & Email

LEAVE A REPLY

Please enter your comment!
Please enter your name here