Reportajen Santy Lucia da Costa
Mini kampaña kandidatu Dr. Jose Ramos Horta iha Munisípiu Bobonaru, Postu Lolotoe. Iha kampaña ne’e Prezidente Partidu Demokrátiku (PD), Mariano Assanami Sabino ne’ebé reforsa Horta iha segunda volta husu votante ne’ebé apoiu nia kandidatu, atu vota ba Ramos Horta, tanba Ramos Horta sei servisu hamutuk ho governu ba nia programa sira relasiona ho apoiu setór produtivu, no povu ne’ebé moris ho negósiu ki’ik sira, tulun sira liu hosi loke kréditu aas iha banku atu fasilita sira nia atividade negósiu, no mos hadi’a rendimentu agrikultór kafé.
Iha kampaña ho povu Lolotoe, líder PD hato’o, wainhira Dr. Ramos Horta sai Prezidente da Repúblika, nia sei fo pose ba governu ida ne’ebé efetivu, hadi’a liu tan saída mak agora da-dauk halo ne’e. Hadi’a lalais estrada, hasa’e folin kafé nian, dezenvolve lalais kafé, hodi nune’e povu hotu-hotu bele asesu ba osan, para hasai kiak ne’e hosi uma laran, hasai kiak ne’e hosi ita nia leet.
“Wainhira Dr. Ramos Horta sai Prezidente nia iha planu ona, nia iha program ona, wainhira governu ida ne’ebé nia atu fo pose, nia hakarak fo responsabilidade, ko’alia ba sira atu tau osan iha banku para fo kréditu ne’ebé mak aas, ba loke keos, ba hakiak balada sira, ba sira ne’ebé halo to’os, sira ne’ebé halo natar i nomos sira ne’ebé kuidadu rehabilita kafé no sira ne’ebé ke fa’an kafé. Ema hotu-hotu ne’ebé fila-liman, banku mak tenki fasilita halo kréditu ida ne’e,” dehan Assanami iha Lolotoe wainhira akompaña Xanana Gusmão halo mini kampaña ba kandidatu Ramos Horta.
Assanami salienta, durante iha Parlamentu Nasional sira sempre ko’alia konabá dezenvolvimentu seitor produtivu liu hosi kréditu no tulun agrikultor sira, maibé susar atu realiza programa hirak ne’e tanba la hetan aseitasaun iha Parlamentu rasik.
“Durante ami nia tempu iha Parlamentu ami hakilar be-beik, maibé ema taka tilun, ema lakoi tau osan iha ne’ebá, ema gosta ne’e fahe oi-tuan osan ne’e wainhira besik kampaña, ko’alia fali ida ne’e para vota sira, lakoi harii aliserse ekonomia ne’ebé mak povu mak tenki sai autor ba ekonomia, benefísiu ba ekonomia, para atu hasai povu ne’e hosi kiak no mukit, tanba ne’e ohin ha’u hamriik fali mai iha ne’e, atu alerta ba hotu-hotu, para imi hotu-hotu hamutuk, para ita lori fali Dr. José Ramos Horta ba Prezidente da Repúblika,” Assanami alerta ba vontante sira iha Lolotoe, kinta-feira, 07/04.
