Reportajen Adroaldo “Saretukau”
Institute of Bussiness (IOB) English Class realiza semináriu ho tema “Empowering the Youth Through English Capacity Buiding,” hodi halo enseramentu no fahe sertifikadu kursu lian Inglés ba estudante IOB na’in 93 ne’ebé finaliza ona sira nia kursu durante sira aprende.
Iha ensentamentu ne’e, Kordenador ba Kursu lian Inglés iha IOB, Marzenio Lopes iha nia diskursu hato’o, objetivu hosi organiza semináriu ida ne’e mak atu prova ka hatudu rezultadu ba reitor IOB ne’ebé suporta program kursu refere. Nia hatutan, kursu refere ho klase lima ho total estudante kuaze na’in 93 kada klase. Sira hotu mesak estudante IOB no departamentu keta-ketak, ne’ebé sira atende kursu semana ida dala tolu no iha momentu ikus ne’e sira hein hodi simu sira nia sertifikadu. Nia mos agradese ba fasilitador sira ne’ebé fahe ona sira nia matenek ba estudante sira.
“Hanesan ha’u estuda iha IOB, ha’u rekoñese katak estudante sira sei la iha esperiénsia di’ak hafoin remata sira nia estudu, tan ne’e ha’u hanoin iha oportunidade oferese kursu lian Inglés ba sira. Tanba ne’e ha’u konvida ha’u nia belun sira iha IOB no univerisdade seluk ajuda kolega estudante sira. Ho susesu ami organiza no oferese kursu gratuita ba estudante hirak ne’e ho apoiu hosi Reitor, agradese tebes ba ita nia apoiu,” Marzenio hato’o.
Kordenador ne’e akresenta, liu hosi kursu ida ne’e mak sei prova estudante sira liu hosi sira nia diskurus ne’ebé sei hato’o ho tópiku diferente. “Ha’u bele haree no hatete, kurusu ida ne’e benefísia estudante barak la’os aumenta de’it sira nia Inglés maibé mos sira abilidade lideransa no transforma sira nia hanoin ida gasta tempu no halimar ho sira nia belun sira hodi gasta tempu ba aprende no hasa’e sira nia kapasidade.” Nia hatutan, la’os de’it aprende Inglés maibé sira bele iha interasaun balu no bele envolve mos iha organizasaun voluntáriu sira.
“Labele husu saída mak o nia nasaun halo ba o, maibé husu o nia aan saída o halo ba o nia nasaun. Mai ita hahú ho asaun ki’ik no halo rezultadu ka mudansa ne’ebé boot iha ita nia nasaun. Hadomi saída mak o halo no halo saída mak o hadomi, Obrigadu no parabéns ba imi hotu, favor fahe imi nia koñesimentu ba imi nia belun sira, se o fahe barak liu, o sei hatene barak mos, o hatene barak no oportunidade barak sei iha ba o,” Kordenador Marzenio enkoraja estudante sira.
Iha fatin hanesan estudante kursu lian Inglés Intermediáriu hosi IOB, Ricardo J.M. da Costa, hato’o obrigadu, orgullu no nia sente Kontenti no apresia tebes ba nia aan tanba bele hetan oportunidade hodi aprende kursu lian Inglés, ne’ebé hanesan lian internasional iha mundu, no bele termina ho di’ak. “Liu hosi ida ne’e hodi fo hanoin nafatin no enkoraza nafatin ha’u nia aan atu labele para ho ida ne’e, maibé oinsé ha’u atu bele aprende liu tan atu nune’e bele iha abilidade no iha skill ne’ebé razoavel liu-liu iha lian Inglés,” Ricardo hato’o.
Iha parte sorin Reitor IOB, Dr. Pedro Ximenes agradese ba fasilitador sira nia servisu maka’as no fo ona kontribuisaun ba hanorin estudante sira ba kursu lian Inglés ne’e. Reitor IOB ne’e hato’o ba estudante sira katak wainhira hatene lian sira hanensa Tetun, Portugés no Inglés, sei hatene liutan ita nia moris. “Iha lia-fuan filózifu Xina nian ne’ebé hatete, viajen atu boot halu nusa nia hahú ho pasu ki’ik ida. Ita boot sira hahú viajen ida mak boot teb-tebes, maibé imi foin hahú imi nia pasu primeiru. Ha’u espera imi sei foti tan pasu seluk hodi la’o nafatin.” Reitor IOB hato’o ba estudante sira.
