Home Analisa Liberdade Imprensa: Jornalista Tenke Funu Ho Laran

Liberdade Imprensa: Jornalista Tenke Funu Ho Laran

419
0
Everd Scor Rider Daniel. [Foto: Dok. privadu | 03.05.2021]

Hakerek nain Everd Scor Rider Daniel

World Press Freedom Day (WPFD) selebra iha loron 3 fulan-Maiu, nu’udar Loron Internacional da Liberdade de Imprensa. Loron ne’ebé nakonu ho esperansa ba povu nia liberdade.

Iha loron liberdade imprensa ida ne’e, apela ita hotu halo reflesaun, liu-liu Jornalista sira tenke reflete ba loron ida ne’e: oinsa posizaun moral hosi Jornalista, iha laloran informasaun ne’ebé agora ita hotu enfrenta daudaun? Neste momentu, povu enfrenta moris ne’ebé nakonu ho informasaun. Cadavez, informasaun bele sai matadalan ba ita, no mos bele lori ita ba hasoru dezastre wainhira ita konsumu informasaun ne’ebé la saudavel.

Sistema demokrasia apoiu liberdade informasaun, tantu iha mídia imprime e elektrónika. Sinais ne’e alerta ba servisu Jornalista, atu hamriik ho ninia independensia e tenke funu ho laran hodi serví povu nia kuriosidade, nafatin luta defende lia-loos ho prinsipiu jornalizmu “cover both sides”.

Jornalista nu’udar representante instituisaun mídia nian, agora daudaun enfrenta servisu ne’ebé todan. Aleinde nia papel serví povu nia kuriosidade, au mesmo tempu oinsa defende informasaun ne’ebé saudavel ba povu. Kestaun ne’e hanesan exame de konsiensia ba kredibilidade Jornalista sira nian. Tanba ne’e, obriga Jornalista sira atu hakas-an hodi komprende akontesementu iha terrenu, tanba antes Jornalista sira hakerek testu, sira tenke komprende ninia kontestu. Testu deskobre hosi kontestu, e kontestu maka konstrui testu. Iha interligado entre asuntus rua ne’e. Definisaun hosi testu maka hanesan literatura ne’ebé hakerek iha livro, no kontestu refere ba akontesementu. Kualker tempu, obriga Jornalista sira tane as ninia kuriosidade e kapasidade hodi analiza kontestu, antes nia hakerek testu. Jornalista tenke konsientiza katak labele deit kesi nia-aan ba testu, maibe deskobre kontestu.

Priviléjiu maka Jornalista sira hetan liu hosi konfiansa povu nian, nu’udar ema ne’ebé hamriik iha primeira linha hodi hakerek informasaun ba públiku. Tanba ne’e, hosi povu nia konfiansa maka determina Jornalista nia ezistensia. Jornalista nian servisu, importante e prinsipal tebes, tanba diretamente liga ho interese komum, ne’ebé povu presija étika-moral hosi Jornalista sira hakerek ho onestu, livre hosi interese, no hato’o lian hosi sira ne’ebe laiha lian (lian laek/kbiit laek sira).

Jornalista ne’ebé representa instituisaun mídia nian, tenke esforsu kona-ba nia integridade atu defende faktus. Jornalista prontu hodi entrega sira nia-an tama ba kampu de batalha (arena perang), hamriik ho nia imparsialidade hodi funu hasoru problema injustisa, ezerse servisu ho profesional, labele kahur faktus ho interese polítika.

Ne’e hanesan desafiu ida maka agora públiku enfrenta tanba informasaun balun ne’ebé mídia lansa, sempre hamosu interpretasaun no tendensaun polítika. Problema ne’e laos buat ida segredu, tanba ita hotu rekonhese katak iha sistema nia laran laiha buat ida maka livre “free value” (tidak ada sesuatu yang bebas nilai). Relasaun komersial e polítika sempre eziste, liu hosi sistema simbiose mutualismu ne’ebé normalmente akontese, maibe importante liu maka mídia labele lakon konfiansa hosi povu.

Jornalista Tenke iha Kuriosidade e Sempre Duvidas

Jornalista tenke hamriik ho prinsipiu e karakter ne’ebé metin, katak sempre sente duvidas nafatin ba kualker situasaun maka nia enfrenta (Ishwara, 2005). Ida ne’e hanesan rekejitus prinsipal hosi Jornalista antes nia hakerek. Tom Friedman, Jornalista New York Times, ne’ebé foka makas kona-ba: nusa jornalista sira tenke “duvidas”? labele simu lia anin ka rumoris, ansi atu fiar ba buat ida, maibe primeiru Jornalista tenke duvidas ho saida maka nia simu antes nia klarifika, hodi prevene lia falsu. Jornalista ne’ebé mantein atu duvidas nafatin ho saida maka nia rona ka hare, concerteza hatudu katak nia iha karakter ne’ebé forte no la naran fiar ba lia anin, antes nia verifika faktus (fack checking) kona-ba informasaun maka nia simu (Ishwara, 2005).

Wainhira hasoru situasaun ka problema ruma, Jornalista tenke defende prinsipiu 5 W + 1 H (What, When, Where, Who, Why + How) nu’udar matadalan ida hodi pronfunda kontestu. Antes atu hakerek noticias, Jornalista presija pontu interogasaun lubuk ida: saida maka akontese; nusa problema ne’e mosu; bainhira ne’e sai problema; se maka kria problema ne’e; nia akontesementu iha ne’ebé; oinsa rezolve problema ne’e. Kestaun ne’e ligado ho prinsipiu Jornalismu, wainhira ezerse sira nia profisaun.

Jornalista mantein nia posizaun katak nia tenke duvidas! liu hosi dalan ida ne’e, ninia ezistensia sei bele moris (hanya dengan bersikap skeptis, Jurnalis akan selalu hidup). Hanesan ita akompanha, realidade hatudu mídia barak maka lakon ninia konsiensia krítika, tanba maioria tama iha ambiente “cheerleader complex”: selebra e satisfas ho saida maka iha, ladun esforsu e deskobre buat foun, maibe lao tuir dalan ne’ebé maka iha tiha ona (ikut arus). Mídia imprime ka elektronika, hotu-hotu kompete hatuun noticias atu duni tarjetu deit (kuantidade) maibe ladun konsidera ninia kualidade. Ida ne’e hanesan auto krítika ba mídia nia servisu, tanba ita hotu nia dever, presija konstrui mídia nia kualidade. Joseph Pulitzer hateten, mídia nunka atu sai boot, wainhira ezerse deit ninia lansamentu ka publikasaun jornal barak-barak, maibe tenke hakerek noticias ne’ebe ekslusivu.

Bazeia ba hakerek nain nia esperensia nu’udar Jornalista iha Jakarta, hau hanoin ita presija muda kultura hakerek mídia hosi Straight News muda ba In Deepth News. Primeiru, Straight News hanesan noticias badak maka loron-loron jornalista sira hakerek online (maioria ninia formatura hakerek kona-ba saida maka akontese, maibe la aumenta haklean tan ho analiza ka ideas ruma tantu hosi Jornalista rasik e mos fontes saintifiku). Segundu, In Deepth News hanesan noticias ne’ebé naruk liu, e presija Jornalista nia konsiensia no konhesimentu tékniku, oinsa haklean informasaun ka dadus, no mos analiza hosi fontes akadémiku ka sientista sira nia perspektivu, hodi nune’e konteudu hosi noticias ne’e laos deit aumenta naruk maibe aumenta forte e ekslusivu. Kestaun ne’e presija mentalidade Jornalista, oinsa ezerse prinsipiu investigasaun kona-ba fontes informasaun, nune’e bele deskobre noticias ne’ebé kualidade (labele multiplika ka repete fila fali noticias sira ne’ebé maka hanesan).

Oinsa Midia Defende Faktus?

Maneira oinsa atinje kapasidade intelektual Jornalista sira, tenke liu matadalan ida ne’ebe saintifiku. Bill Kovach no Tom Rosenstiel (2001), iha livru “The Elements of Journalism, What Newspeople Should Know and the Public Should Expect” hanoin ba prinsipiu fundamentais hirak ne’ebé media tenke kaer (Ishwara, 2005):

(1) Dever atu hakerek lia loos; (2) Obedese ba direitu Povu nian ; (3) Disiplina kona-ba verifika faktus; (4) jornalista tenke livre hosi fontes informasaun; (5) knaar jornalista livre atu kritika ba governu; (6) Jornalista tenke fasilita forum krítika ba publiku; (7) Jornalista esforsu kria informasaun ida ne’ebe importante sai interestante e relevante; (8) Jornalista hakerek ho komprehensivu e proporsional; (9) Jornalista tenke responsavel ba nia moral (suara hati).

Jornalista tenke kesi nia-an ba prinsipiu hakerek ne’ebe onestu, hodi eduka povu atu dezenhu ambiente demokrasia ne’ebé livre e saudavel. Kestaun ne’e moraliza servisu Jornalista sira e aumenta sira nia responsabilidade, oinsa ajuda hadia komunidade nia moris sosial, eduka lingua ne’ebe diak, aumenta povu nia konhesimentu, identifika saida maka esperansa povu nian. Fatores hirak ne’e hatudu midia ninian responsabilidade moral. Terminologia ida hosi Noam Chomsky kona-ba “manufacturing consent”, ne’ebé esplika influensia hosi midia nia poder atu forma ema nia hanoin no psikolojia hodi produs konsensus publiku. Iha pontu ida ne’e, responsabilidade Jornalista nian laos limitadu hanesan fahe deit informasaun, maibe sai autor ba justisa hodi hato’o lian hosi sira ne’ebe laiha lian (voice of the voiceless).

*(Everd Scor Rider Daniel nudar Aluno Relações Internacionais e Escritor Media)

Print Friendly, PDF & Email

LEAVE A REPLY

Please enter your comment!
Please enter your name here