Reportajen Joselina dos Santos
Jornalista sira husu ba Kandidatu Prezidente Repúblika iha eleisaun Prezidensiál Periode 2022-2027, atu tau prioridade ba atividade jornalista sira nian, no garantia nafatin liberdade imprensa no liberdade espresaun, tanba jornalista sira mak sai hanesan matadalan ida ba públiku nasionál no internasional sira, hodi fó sai informasaun sira ne’ebe mak akontese iha rai laran no rai liur.
Honorio Guterres (25), Suku Ossu Decima Postu-Administrativu Ossu Munisipiu Vikeke, nia esperansa ba Kandidatu Prezidente Repúblika aktual ne’ebé povu fó fiar fo nia direitu no konfiansa tomak ba nia atu sai Aman ba Estadu, tenke mai ho komprimizu ida ne’ebé mak durante halo iha kampu politika no mos hakbesik a’an ba povu hodi resolve povu nia moris ne’ebé mak durante ne’e povu halerik.
“Karik entre Kandidatu nain rua ne’e ida ne’ebé sai Prezidente hodi ukun ita hotu, tenke iha dever no kompentensia tomak atu kontrolu meius komunikasaun sosial nian ne’ebé mak eziste iha Timor-Leste,” Dehan Jornalista Honorio ba Neon Metin iha Jardin 05 Maiu, 06/04.
Nia dehan la bele pertensia ba jornalista sira, maibe tenke kontrola nia Instituisaun ou nia media rasik, kontrolu oinsa atu komunika ho jornalista sira iha terenu, atu bele fo sai informasaun ne’ebé lig HO atividade Prezidente nian, ou atividade órgaun haat, ne’ebé mak estabelese iha Timor-Leste. Ukun ho diak no responsabilidade atu nune’e povu nafatin tau fiar hodi bele lori nasaun ne’e ba oin, la bele ukun ho oportunidade maibe la iha responsabilidade.
Iha parte seluk Ivonia da Silva (24), Suku Uaibobo, Postu-Administrativu Ossu Munisipiu Vikeke hatete, Nu’udar Jonalista Media Online nia esperansa ba Kandidatu Prezidente Republika iha Eleisaun Segunda Volta katak, Kandidatu ida ne’ebe mak sei eleitu iha eleisaun Prezidensial periode 2022-2027, tenke tau importansia ba Jornalista sira, tanba dala barak sira dehan jornalista mak sai hanesan matan no tilun ba komunidade maibé sira la tau importansia ba ida ne’e.
“Kandidatu sira tenke tau fatin ne’ebe seguru no dignu ba Jornalista sira tanba Jornalista mos sai hanesan seguransa ida ba informasaun, tanba jornalista sira mos servisu hanesan F-FDTL no PNTL inklui profesionál Saúde sira, maibé realidade ikus presiza mak foin haree maibe kuandu iha momentu ne’ebe sira la presiza sira la dun tau importansia ba Jornalista sira,” Dehan Ivonia ba Neon Metin iha Kaikoli, 04/22.
Tuir nia observasaun dala barak Nain Ulun sira tau impostansia deit ba Media Eletronika media impreme no media online sira, nu’udar kandidadu foun tenke tau prioridade mos ba Jornalista sira karik jornalista laiha sira nia atividade sei la publika iha nasional no mundu internasional. Jornalista mak bele lori informasaun sira ne’ebe akontese iha rai laran no rai liur liu-liu problema hirak ne’ebe akontese iha area remotas sira.
Nune’e Ivonia Hakarak husu ba Prezidente eleitu foun atu ajuda Jornalista sira nia intituisaun hodi selu no aumenta Jornalista sira nia salariu, tanba jornalista maioria nia salariu hanesan salariu estandar, karik Kandidatu prezidente sira hanoin katak Jornalista nia kna’ar ne’e importante entaun tenke tau importansia no nia salariu mos tuir ida ne’e.
Natalino da Costa (28), Suku Fatuhada Postu-Administrativu Dom Aleixo Munisipiu Dili hatete, Dadaun ne’e tama ona ba iha Kampaña Prezidensial Segunda volta nian, tanba ne’e nu’udar Jornalista husu ba Entre Kandidatu Prezidente Nain rua ne’e ida ne’ebe mak povu fó fiar hodi lidera nasaun durante tinan 5 nia laran, tenke iha komunikasaun di’ak no akumula entidade hotu-hotu hodi promove dialogu ho lideransa sira hodi garantia ba povu nia moris diak.
“Ha’u husu ba Kandidatu eleitu foun karik bele, garante nafatin liberdade imprensa no liberdade espresaun ba ema hotu no mos fó livre ba Jornalista sira tuir Kódigu Jornalista nian. Tanba Media nia papél importante ba prosesu dezenvolvimentu nasaun nian, nune’e mos media sai hanesan fatór importante ida ne’ebe sai parseiru ba Governu no estadu atu divulga prosesu informasaun nasaun nian,” nia dehan.
Nia dehan karik bele ba Prezidente Republika rekomenda no Parte Governu, atu nune’e labele iha diskriminasaun entre media, no mos profesionaliza iha área Komunikasaun Sosial liu-liu Jornalista sira, oinsa hakbiit sira nia koiñesimentu ne’ebe kle’an iha área jornalizmu nian, atu nune’e servisu jornalistika nian ho kualidade no responsabilidade.
Zita Menezes (24), Suku Afaloicai Postu-Administrativu Uatu-Lari Munisipiu Vikeke, Nu’udar jornalista Nia Esperansa ba kandidatu Presidente Repúblika iha segundu volta, espera katak bele hametin nafatin páz no estabilidade iha nasaun ida ne’e, hodi nune’e povu bele moris livre no konfortavél iha eleisaun segundu volta, nomós husu kandidatu atu tau importánsia mós ba jornalista hirak ne’ebé hala’o nia kna’ar durante iha kampaña nia laran no fó liberdade ba sira nune’e sira bele hato’o informasaun be’ebe kredivél ba sosiedade sira.
“Ezijénsia ba kandidatu katak entre kanditatu rua ne’e se de’it mak atu sai Presidente Repúblika, tenke tau prioridade ba povu nia moris no halo dezenvolvimentu iha setór hotu, no kria kampu traballu barak, hodi nune’e hamenus dezempregu iha ita nia rai laran,” Dehan Zita ba Neon Metin.
Nia Husu ba Eleitu Presidente Repúblika iha tinan 5 mai ba futuru iha área komunikasaun sósial, mak tau prioridade ba servisu SEKOMS nian, hodi bele servisu hamutuk ho jornalista sira iha Timor-Leste, fó formasaun iha área jurnalismu nian, jornalista sira bele domina servisu jornalista iha terenu, no sai jornalista profissionál liután iha futuru hodi sai matan no tilun ba públiku sira.
Rufino dos Santos Barreto (25),Suku Lauhata Postu-Adminitrativu Bazartete, Munisipiu Likisa, nia esperansa ba entre kandidatu Prezidente Repúblika nain rua ne’ebe mak povu relata iha eleisaun prezidensi periode 2022-2027, tau importante ba Jornalista sira atu asesu Informasaun ne’ebe iha sosiedade ka iha fatin ne’ebé seguru no kredivel atu nune’e influensia Informasaun iha fatin ne’ebé deit no mos responde ba povu nia susar no harelik sira.
Sabina Sancha Cardoso (22), Suku Manutasi Postu-Adminitrativu Ainaro Vila Munisipiu Ainaro, nia esperensia ba Prezidente Republika iha eleisaun prezidensial periode 2022-2027, katak entre kandidatu nain 2 ne’e ida ne’ebe mak povu hili atu sai aman ba nasaun ida ne’e karik, tenke tau prioridade mos Jornalista sira tanba iha informasaun balu katak ema balu fó impedimentu ba jornalista sira nia atividade.
