Reportajen David da Costa Gusmao
Primeiru Ministru (PM), Taur Matan Ruak, iha Sesta 3/06, hetan vizita ofisiál husi Konselleiru Estadu no Ministru Negósius Estranjeirus Repúblika Popular Xina, Wang Yi hodi hametin liután relasaun bilateral pais rua nian iha ultimo tinan 20 ne’e.
Iha enkontru ne’e Xefe Governu Timor-Leste Taur Matan Ruak, liuhosi Ministru Negósiu Estranjeiru, Wang Yi, agradese tebes ba Governu Xineza nian ba apoiu hotu durante tinan 20 ikus ne’e, no agradese espesiál mós ba apoiu medikamentu no ekipamentu protesaun nian iha mitigasaun no prevensaun COVID-19 nian durante períodu pandemia.
“Parte rua konkorda katak sei hametin liután lasu amizade ne’ebé la’o ona durante ne’e hodi respeita nafatin prinsípiu sira Estadu ida-idak nian ,” dehan iha komunikadu ne’ebe Neon Metin asesu, Sesta 3/06.
Iha okaziaun enkontru ne’e, Xefe Governu Timor-Leste no MNE Wang Yi loke simbólikamente plaka komemorativu tinan 20 estabelesimentu relasaun diplomátika entre Timor-Leste no Xina.
Durante Estadia oras 24 iha Dili, Ministru Negósiu Estranjeirus, Wang Yi sei hala’o enkontru bilateral ho nia ómologa timorense, Adaljiza Magno hodi fó sasin ba asinatura akordu entre Governu Repúblika Demokrátika Timor-Leste no Governu Repúblika Populár Xina iha área sira hanesan; Kooperasaun Ekonómika no Téknika, Área Saúde, Administrasaun Rádiu no Televizaun Nasionál (RTTL) no akordu kontinuasaun prosesu dijitalizasaun RTTL no projetu televizaun dijitálál terrestre.
Akompaña Xefe Governu Timorense iha enkontru ne’e mak hanesan, Ministra Negósius Estranjeirus no Kooperasaun, Adaljiza Magno, Ministru Prezidénsia Konsellu Ministru, Fidélis Magalhães, Embaixadór Timor-Leste ba Xina, Abrão dos Santos, Diretór Jerál Asuntu Bilateral, Domingos Savio, Xefe Gabinete Primeiru-Ministru, Azevedo Lourenço da Costa Marçal, no etc.
Enkuantu akompaña Ministru Negósiu Estranjeiru, Wang Yi, mak hanesan, Embaixadór Xina iha Dili, Xiao Jiangou, Vise-Ministru Negósius Estranjeiru, Xie Feng, Ministru Adjuntu, Ministériu Komérsiu, Guo Tingting, Vise-Diretor Ajénsia Kooperasaun Internasionál ba Dezenvolvimentu Xina, Zhao Fengtao, Sekretáriu Konselleiru Estadu no Ministru Negósius Estranjeiru nian, He Wei, Vise-Diretor Jerál Departamentu ba Asuntu Norte Amerikanu no Oseánia-MNE, Yao Wen, no Vise-Diretór Jerál Departamentu Informasaun MNE, Jiang Xiaoyan.