Reportajen David da Costa Gusmao
Ministra Negósiu Estranjeiru no Kooperasaun (MNEK), Adalgiza Magno lakohi halo justifikasaun kona ba vizita Konselleiru Estadu Ka Ministru Negósiu Estranjeiru Repúblika Popular Xina, Wang Yi ne’ebé lakohi atu halo entrevista ho jornalista sira.
Tuir Ministra Adalgisa katak ida ne’e regra nasaun Repúblika Popular Xina nian, tanba Xina aplika hela zero COVID-19
“Hau sei la tenta atu justifika saida maka sira dehan, tanba sira nia regra iha sira raí laran, Xina sei implementa hela zero Covid-19, kuandu ba raí liur labele iha interasaun besik, tanba sira kuandu fila ne’e sira tenke kumpre regras ne’ebe iha sira nia raí laran, entaun sira hanesan governante presiza hatudu ezemplu,” Ministra Adalgiza Magno responde ba preokupasaun husi jornalista sira, hafoin akompaña MNEK Xina ba hasoru Primeiru Ministru (PM) Taur Matan Ruak, iha Palasiu Governu sesta 3/06.
Governante ne’e haktuir, tanba regras husi Repúblika Popular Xina ne’e rigorozu tebes, espera katak maluk jornalista sira labele tau ba kestaun konaba la halo entrevista ho Ministru Negósiu Estranjeiru Republika Popular Xina Wang Yi ne’e.
“Prontu ida ne’e kestaun sira mak husu, ita la akomoda mós susar, tanba sira nia rai ne’ebá rigorozu ka ketak los, maskei ita nian iha ne’e livre tiha ona, tanba sira nia polítika mak hanesan, hau espera katak maluk jornalista sira keta hirus, keta lori ba lia”, Adalgisa esplika.
Nune’e iha sorin seluk, Konsellu Imprensa Timor-Leste (KI) mos lamenta tebes desizaun ne’e, no halo protestu hasoru MNEK, tanba taka dalan ba Jornalista sira atu buka informasaun no hato’o informasaun ba públiku relasiona ho vizita kortezia husi Ministra Negósiu Estranjeiru no Kooperasaun Repúblika Popular Xina mai Timor-Leste.
