Companheiro Saudozu Jose Vicente Martins Fontes ”Relvas”, fila hikas ba Maromak nia Kadunan Santu iha loron 29 fulan Juñu 2022. Saudozu husik hela faluk Izaura Perreira, oan mane mesak Jordão Valentino Perreria Fontes.
Companheiro Jose Vicente Martins Fontes ”Relvas”, moris iha loron 29 fulan Augusto 1964, iha Aldeia Vila Maria, Suku Rairobo, Posto Administrativo Atabae. Oan husi Daniel Augosto Fontes no Isabel Martins. Sira maun-alin hamutuk na’in 10, mane na’in 7 no feto na’in 3.
Saudozu Jose Vicente Martins Fontes” Relvas”, hahu ninia estudo eskola iha tinan 1969 no ramata 4ª klasse iha 1974 iha Eskola Primaria Municipal de Atabae.
Iha 1974-1975, companheiro Saudozu Jose Vicente Martins Fontes ”Relvas”, nia estudus interrompidu tanba hahu mosu golpe no kontra-golpe. Iha tempu ne’eba, biar ho otas ki’ik, Saudozu rejistu nudar militante ba Partidu FRETILIN.
Wainhira militar Indonezia sira kontrola ona Atabae iha 1976 companheiro saudozu Jose Vicente Martins Fontes ”Relvas” kontinua hikas nia estudos hosi kelas 4, iha Sekolah Dasar (SD) iha Postu Administrativu Atabae ne’ebe loke husi eis Seminarista husi Indonesia, husi tinan 1977 – 1979. Husi Atabae, nia ba kontinua nia estudus ba kelas 1 SMP iha tinan 1979-1980 iha Atambua. Hafoin iha tinan 1980 companheiro saudozu Jose Vicente Martins Fontes ”Relvas” muda hikas fali mai Munisipiu Bobonaro hodi kontinua SMP kelas 2 no akaba klase 3 iha 1982.
Hasai tiha SMP iha Maliana, companheiro saudozu Jose Vicente Martins Fontes ”Relvas” hetan Bolsu Estudus husi PEMDA Tingkat I Timor-Timur hodi kontinua ninia estudus iha STM Negeri Solo, Jawa Tengah, Indonesia, husi tinan 1982 to’o 1985.
Iha tinan 1985 Saudozu Jose Vicente Martins Fontes ”Relvas” kontinua nia estudu iha Jurusan Arsitektur, Fakultas Teknik Universitas Tunas Pembangunan Surakarta, Solo, Jawa Tengah, Indonesia, no konklui nia kursu iha tinan 1994.
Iha inisiu tinan 1989, Jose Vicente Martins Fontes, simu juramentu nudar Militante RENETIL ho naran kodigu RELVAS iha Região Nicolao Lobato, Solo, Jawa Tengah, Indonesia. Iha tinan hanesan Saudozu Relvas simu resposablidade nudar Chefe Departemento Agitação e Propaganda Politica (AGIPRO) iha Região Nicolao Lobato. Companheiro Relvas simu todan ida ne’e ho kometimentu no responsabilidade tomak, hodi hala’o ajitasaun politika ba estudantes Timor-oan sira ne’ebe estuda iha Solo hodi luta ba ukun rasik an, no iha tempu hanesan kontinua ninia estudu. Aleinde responsabilidade ida ne’e, wainhira RENETIL hahu’u estratégia Indonesiação do conflito de Timor-Leste, Companheiro Relvas mos halao papel importante ida hodi hametin kontaktu no koordenasaun ho aktivista no akademiku pro-demokrasia Indonesia nian hanesan Companheiro Saudozu George Aditjondro “Railakan”, Companheiro Arif Budiman no Companherio Ariel Heryanto iha Salatiga, Jawa Central, Indonesia. Companheiro Jose Vicente Martins Fontes ”Relvas” dala barak mos partisipa iha aktividade movimentu pro demokrasia Indonesia hanesan Solidaritas Mahasiswa Indonesia (SMID) iha Solo.
Hafoin halo hotu nia estudus, Companheiro Saudozu Jose Vicente Martins Fontes ”Relvas” fila hikas mai Timor-Leste iha tinan 1994 hahu’u nia kareira professional nudar Arkitetu iha funsionariu publiku Dinas Pekerjaan Umum Propinsi Timor-Timur to’o tinan 1999. Iha tempu hanesan, Saudozo Companheiro Relvas kontinua kontaktu ho mmilitante Renetil sira seluk iha Direção Geral da RENETIL em Timor-Leste (DIGERTIL) hodi hala’o atividades resistensia hamutuk ho Juventude Lorico Ass’wain sira to’o konsulta popular iha tinan 1999. Iha preparasaun ba konsulta popular iha tinan 1999, Companheiro Relvas halo parte ba ekipa kampanye real (door to door) espesialmente iha ekipa 11 rejiaun 4 hamutuk ho Companheiro Samala Rua no Companheiro Aderito Soares iha Municipio Bobonaro. Iha tinan 2000 to’o husik hela ita Companheiro Saudozu Jose Vicente Martins Fontes ”Relvas” kontinua nia kna’ar nudar funsionariu publiku no iha tinan barak nia laran asumi mos kargu nudar chefe Departemento to’o Diretor Nasional iha Diresaun Nasional Edifikasaun no Habitasaun iha Ministeriu Obras publika.
Companheiro Jose Vicente Martins Fontes ”Relvas” ninia mate neé hanesan lakon boot ida ba familia no ba RENETIL. Kontribuisaun sira neébe nia fo ba funu libertasaun do povu no libertasaun da patria sei kontinua iha RENETIL nia memoria, no ninia ezemplu sira sei kontinua hela ba ninia familia no ba companheiro sira atu banati tuir.
Adeus, Adeus, Adeus Pai, Tiu, Maun no Companheiro de Luta. Ate Sempre!