Reportajen Silvino Freitas
Eis FALINTIL Jose Barreto ‘Koli Soeharto’ sira halai ba ai-laran hodi lakon família riku soin maibe nia husu de’it atu estadu halo rekonsiliasaun ho Indonesia, atu ema hotu bele moris iha paz nia laran, tanba funu laos nia mesak mak terus maibé ema barak, tanba iha Dezembru invazaun tama ema halai sae hotu ba foho.
Eis FALINTIL José Barreto ‘Koli Soeharto’ dehan, iha 6 Dezembru sira hemu tua nune’e iha 7 Dezembru sira toba dukur loos, maibé iha sira nia maluk naran Maubuti bolu nia ho Meno Paixao, dehan aviaun soe bola, tanba aviaun soe prakedas nia la hatene, prakedas kabuar entaun nia mak halai sai uluk ba, nune’e nia hakilar nia uma laran prakedista tun ona, “tanba ami iha uma nee, vizinu barak sira nain 14, iha oras tuku hitu, ami halai sai maibe prakedista tun tiha ona, too Taibesi ami sai ho automovel ida, ami ba hela aituri laran, ema sae ona husi lahane maibe ema la tuir ami entaun sira halai liu ba same no nia hamutuk ho komadante Nicolao Lobato sira hela ho tropa sira hodi tahan invazaun ne’e”
“Momentu hau idade 22 sei joven hela hau desarmadu ,mais iha kruzamentu Remixio nian ne’e hau dezarma kolega ida ho J3 nia halai sai, hau sei lembra hau armadu nee iha 14 Dezembru 1975” haktuir eis FALINTIL José Barreto ‘Koli Soharto’ iha CCLN Comoro, (02/12).
Nia haktuir tan, invazaun mosu nia laiha hanoin tauk, maibe ho prinsípiu ida atu kontra invazaun sira ho família tomak halai sae hotu ba ailaran maskí ema balun rende, maibe sira ho família hakarak ukun an entaun sira halai hotu ba ai-laran, nunee sira lakon família lakon riku soin maskí nune’e maibé nia husu deit atu rekonsilia ho Indonesia, para ema hotu bele moris hakmatek tanba laos nia mesak mak terus tanba ne’e presiza rekonsiliasaun, nune’e Indonesia tenke rekoñese tanba prosesu balun hatama ona tribunal internasionál maibé governu mak hatene prosesu sira ne’e.
“Hau ko’alia ba hau nia an, iha tempu ne’ebá iha baze apoiu no lina fogu hasoru susar mak aimoruk laiha, hahan laiha tenke buka naok hahan ne’e difikuldade hanesan hahan ho ai-moruk ne’e araska” haktuir veteranu Koli Soeharto.
Nia konklui, ezijensia ba Indonesia kona-ba restu mortais nee la’ós prezidente Nicolao Lobato de’it maibé inklui mos ema barak ne’ebé Indonesia soe ba tasi balun hakohi subar hanesan uluk iha tasi tolu, barak família buka hela la hatene sira nia paradeiru nunee hanesan timoroan eziji ba Indonesia atu hatudu ita nia ema sira ne’e hakohi iha ne’ebé.
