Home Feature Adelino Nudar Cleaner Ba Kombate Covid-19 Iha Hotel Audian

Adelino Nudar Cleaner Ba Kombate Covid-19 Iha Hotel Audian

1346
0
Adelino da Costa cleaner iha Hotel Audian.[Foto: Zevonia Vieira | 09.04.2020]

Reportazen Zevonia Vieira

Surtu moras Corona ne’e ema hotu preokupa no tauk, maibe ba ema sira ne’ebe maki ha linha oin [front line. Red] sira brani no kontinua halo sira nia serbisu, hodi ajuda estadu ida ne’e. Alende professional saude, mediku no seguransa, maluk cleaner sira [ema sira ne’ebe hamoos rai. Red] mos hamrik iha linha oin, hodi halo sira nia serbisu, sira kontinua hamoos fatin kuarentena sira, atu nune’e nafatin hijiene no moos.

Adelino da Costa uza maskra Cirúrgicas, hodi loke portaun hotel Audian ba ami hodi hakat tama ba hotel. Adelino halo funsaun rua iha hotel Audian iha tempu estadu emerjensia, nia hanesan Security no cleaner ka ema ne’ebe hamoos rai iha hotel.

Adelino haktuir ba Neon Metin katak, kontinua hamoos hotel ne’e maske iha maluk sira Timor sira neebe mai kuarentena iha ne’e.

“Hau hatene saida mak virus Corona, hau akompanna liu hosi televisaun ne’ebe ema sempre fo sai, iha fatin hotu ema fo informasaun konaba Corona. Iha hotel Audian ita nia maluk Timor oan sira mai Kuarentena ihane’e, hau la sente tauk ba sira, tanba hau hatene sira nee diak hotu no nudar Timor oan, hau fiar sira mai kuarentena iha ne’e, sira diak hotu. Hau sente diak, halo serbisu normal, kolega barak mak latama serbisu bainhira hotel nee simu maluk sira tama iha ne’e no lakohi mai tanba sira tauk”, tenik Adelino ba Neon Metin, 09/04.

Adelino mai hosi municipio Baucau, nia hahu nia serbisu nudar security hosi tinan 2013 to’o ohin loron. Adelino komprende diak oinsa proteje an bainhira halo nia knaar loro-loron iha hotel Audia, hodi hamoos fatin sira ne’e.

“Bainhira hau hamos rai no dasa rai sira iha hotel ne’e, hau uza luvas no maskra. Bainhira hau mos hotu tiha, hau hasai luvas ho maskra,  hau kesi hamutuk ba soe iha lixu fatin, depois hau ba fase liman. Ami hetan esplikasaun hosi parte saude nian, oinsa ami prevene an ih fatin kuarentena. Parte saude nian esplika, ami halo tuir loron-loron”, hateten Adelino

 Adelino konfesa katak durante maluk Timor sira ne’ebe mai kuarentena ne’e to’o ohin loron, Adelino ho sira seluk sedauk hamoos kuartu sira ne’ebe mak maluk sira uza, bainhira hotel ne’e mamuk ona, mak sira sei hamoos, razaun tanba ema mak la to’o hodi halo serbisu sira ne’e hotu. Kolega cleaner sira seluk para serbisu tanba bainhira hotel Audian halo fatin kuarentena.

“Kuartu sira hela ba ne’e ami sedauk hamoos too agora, tanba ami sei sibuk hare sira nia hahan, no ema mak la too hodi hamoos, ami hamoos deit hotel laran sira hanesan receptions no baranda sira ne’e. Kuartu ami sedauk bele hamoos kecuali sira sai hotu ona mak ami bele hamoos, kolega cleaner sira seluk mos la brani tanba sira tauk virus ne’e”, tenik Adeino

Adelino hatene klean oinsa prevene nia an hosi virus corona, Adelino konta tuir saida mak nia tenke halo hosi hotel no bainhira nia fila ba uma.

“Bainhira ami fila ba uma to’o iha uma, ami fase fali liman, hasai tiha ropa ami uza nee, depois tau iha liur pois langsung ba haris, pois truka ropa tiha mak ami tama ba uma”, hakutir Adelino

Konaba salariu Adelino simu kada fulan no hetan mos intesivu durante iha situasaun emerjensia ne’ebe mak ekipa integradu sira prepara, inklui mos cleaner sira ne’ebe mak halo iha fatin izolamentu.

Iha parte sorin, Portavoz Centru Integradu Jestaun Krize [CIJK], Dra. Odete Viegas hatan ba preokupasaun Neon Metin nian, konaba cleaner sira ne’ebe mak hamrik iha linha oin, sira kontinua halo serbisu iha hotel sira ne’ebe mak sai fatin kuarentena. Ba Neon Metin Dra. Odete hateten ema sira ne’ebe halo serbisu iha fatin izolamentu no kuarentena ne’e inklui ona cleaner sira.

“Sira ne’ebe mak halo tratamentu iha fatin izolamentu no kuarentena inklui cleaner sira hotu hetan tramentu hanesan, ne’e inklui medikus, enfermeiru no cleaner. Sira hetan asistensia hanesan ho ema sira ne’ebe hela iha kuarentena. Ba cleaner sira ne’ebe mak halo iha fatin izolamentu, sira mos iha obrigasaun atu halo kuarentena durante loron 14 molok sira fila ba uma”, esplika Dra. Odete iha centru media CCD, 09/04.

Print Friendly, PDF & Email

LEAVE A REPLY

Please enter your comment!
Please enter your name here