Reportajen Silvino Freitas
Centro Nasional Chega (CNC) parseria ho Konsellu Imprensa(KI) realiza formasaun, hodi kapasita jornalista sira bele hakerek notísia promove no proteze direitu umanu, hodi kontribui ba paz no estabilidade iha Timor-Leste.
Tuir Diretor Executivu CNC Hugo Fernandez hateten kapasitasaun formasaun CNC halo kooperasaun ho KI atu hatan ba rekomendasaun relatorio CNC nian atu valoriza nafatin knaar jornalista nian mak halo iha luta ba ukun rasik-an.
“Iha luta ba ukun rasik entidade ne’ebé fo nia kontribuisaun signifikante tebes mak mundo jornalismo, liu hosi knaar jornalista sira nian ida ne’e sai tiha komponente importante iha ita nia historia tamba ne’e KI ho CNC hanesan entidade estadu nian tenki kontinua valoriza” dehan Diretor Hugo Fernandes iha salaun parokial Maubisse,(30/03).
Tuir nia valorizasaun ba rekomendasaun ne’e liu hosi formasaun ba jornalista sira atu kontinua hametin sira nia kapasidade no habilidade, iha promosaun ba direitu umanu nian tuir mai dignifika jornalista sira, tama ona ba tinan tolu KI ho CNC kontinua akompaña obra sira jornalista sira nian promove paz no direitu umanu liu hosi atribuisaun premiu jornalismo ba paz Maria Goreti.
“Iha eventu ida hanesan ne’e nuudar komponente husi atividade ne’ebé KI ho CNC halo hodi promove jornalismo ba paz, nunee hametin kapasidade jornalista sira nian atu iha liu tan konsensia ne’ebé di’ak kona ba saida mak paz, direitu umanu no papel saida mak jornalista halo hodi promove asuntu direitu umanu” nia dehan.
Tuir Jornalista Radiu Televizaun Timor Leste (RTTL), Almerio Afonso hateten liu hosi formasaun ne’e bele kapasita di’ak liu tan jornalista sira atu bele fo sai informasaun ne’ebé imparsial hodi netraliza situasaun ne’ebé nakonu ho tendensia konflitu hodi provoka situasaun kursial.
“Baibain peace jounalism (jurnalismu ba paz) ne’e ema uza barak liu ne’e iha situasaun sira konflitu, atu nune’e bele muda situasaun konflitu liuhusi obra jornalistiku e peace jounalism ne’e tenke servisu hamutuk jornalista no editor atu hakerek notisia ninia mensagem notisia ne’e nakonu ho liafuan netraliza situasaun krusial” dehan Almerio iha salaun parokial Maubisse.
Entretantu programa formasaun ne’e realiza durante loron rua kuarta no kinta(30-31) iha salaun parokial Maubisse no partisipa hosi jornalista sira media online, radio, televizaun, jornal no radio komunidade sira.
