Reportajen Estajiada Agustinha Amaral
“KI ko’alia kona-ba liberdade imprensa no liberdade espresaun, maibé iha PDHJ oinsá halo advokasia ba Direitus Umanus. Maibé Prezidente Virgílio iha kometimentu atu serbisu hamutuk nafatin ho KI”. Virgilio
Prezidente atuál Konsellu Imprensa (KI), Virgilio da Silva Guterres, agradese ba Konselleiru no kargu Diretór sira Konsellu Imprensa, ne’ebé fo fiar ba nia hodi hala’o knaar iha KI hanesan Prezidente durante mandatu rua, tanba iha tempu badak sei husik nia kargu nu’udar Prezidente KI, hodi hala’o knaar foun nu’udar Provedór ba Provedoria dos Direitos Humanos e Justiça (PDHJ).
Iha Konferénsia Imprensa ne’ebé hala’o iha Salaun KI, Kintal Boot (20/12), Prezidente KI, Virgilio apresia ho kolega média sira ne’ebé fo ona apoiu ba nia hodi hala’o knaar nu’udar Prezidente KI durante ni-nia mandatu.
“Ha’u agradese no kongratula Francisco temporariamente iha fulan tolu nia laran, tenke serbisu hamutuk ho Ezekutivu no organizasaun profisionál sira, atu bele eleitu prezidente foun hodi troka ha’u nia fatin,” hato’o Prezidente KI.
Nia haktuir, Provedoria Direitus Umanus nia ámbitu la hanesan ho Konsellu Imprensa, tanba KI ko’alia kona-ba liberdade imprensa no liberdade espresaun, maibé iha PDHJ oinsá halo advokasia ba Direitus Umanus. Maibé Prezidente Virgílio iha kometimentu atu serbisu hamutuk nafatin ho KI, iha prosesu tomak ne’ebé la’o hela, maski diferente ambiente entre PDHJ no KI.
Nia husu atu Prezidente sesante Konsellu Imprensa ne’ebé sei troka nia, atu koopera ho organizasaun profisional sira hodi serbisu maka’as no enkoraza sidadaun Timor-Leste oinsá utiliza meius Komunikasaun Sosial liu hosi Rádiu, Televizaun, Jornal no online ho di’ak hodi fo vantajen ba públiku.
“Tanba média hanesan meius ida atu hato’o sira nia inspirasaun no média hanesan direitu ida atu defende direitu profisionál ne’ebé konstituisaun hatete,” dehan Prezidente Virgilio.
Iha biban hanesan nia hato’o, “iha oportunidade ne’e ha’u hato’o apresiasaun profundu ba Parlamentu Nasionál ne’ebé eleje ha’u ba kargu PDHJ. Ha’u mos hakarak agradese ba Partidu Polítiku sira ne’ebé fo apoiu maximu mai ha’u lidera PDHJ,” atual Prezidente KI, Virgilio hato’o agradese liu hosi Konferénsia Imprensa ne’ebé hala’o iha Salaun KI, Tersa ne’e.