Reportajen Joselina dos Santos
Sekretariadu Tékniku Administrasaun Eleitorál (STAE), lansa ona resenseamentu eleitorál, hodi atualiza baze de dadus antes tama ba eleisaun Parlamentár períodu 2023. Resenseamentu ne’e ba sidadaun sira ne’ebé tama ona ba 16 anus no mos sidadaun sira ne’ebe hakarak muda sira nia hela fatin.
Ministru Administrasaun Estatal (MAE), Miguel P. de Carvalho, hatete, STAE, lansa ona resenseamentu eleitorál hodi halo atualizasaun baze de dadus atu nune’e bele antesipa ba eleisaun parlamentár (ElPar) 2023, entaun iha períodu ida ne’e mak STAE ba to’o iha Postu-Administrativu hotu inklui Ataúro atu halo resenseamentu ba sidadaun Timor-oan, ne’ebé ho tinan 16 no mos atu atualiza sidadaun sira ne’ebe muda hela fatin.
Governante ne’e dehan, tuir lei STAE tenke para ona atividade resenseamentu no atualizasaun baze de dadus fulan ida antes tama eleisaun, entaun iha fulan hirak tuir mai STAE sei ba to’o iha Postu-Administrativu sira atu halo revista inklui Ataúro.
“Ha’u nu’udar órgaun eleitorál hakarak hamutuk ho lideransa komunitáriu iha Ataúro atu aviza ba populasaun sira atu hakbesik aan ba sentru administrasaun hodi nune’e bele partisipa iha resenseamentu no mos atualiza sira nia dadus tanba barak mak iha ona kartaun eleitorál maibé presiza atualiza sira nia munisípiu tanba bainhira eleisaun ne’e, ba vota iha suku entaun sira nia unidade jeográfiku ne’e presiza atualiza husi parte suku no mos munisípiu”, nia informa.