Reportajen Jaonina Casamiro
Sekretariadu Tékniku Administrasaun Eleitoral (STAE) hamutuk ho United Nations Development Programme (UNDP), halo preparasaun ba Eleisaun Parlamentár 2023, ne’ebé sei garante ema hotu nia partisipasaun no sidadaun hotu nia direitu.
Diretór Jeral STAE, Acilino Manuel Branco hateten, Ministériu Administrasaun Estatal no STAE aprezenta preparativus tékniku ba iha Eleisaun Parlamentár 2023 nian.
“Ami ohin hetan oportunidade hodi bele aprezenta STAE nia preparasaun ne’e to’o iha ne’ebé ona, saída mak durante ne’e STAE halo ona no saída mak seidauk halo, para depois kontinua halo esforsu preparasaun sira ne’e bele feitu tuir kalendáriu, funsiona ona prontu atu bele implementa hodi realiza eleisaun Parlamentár 2023,” dehan Diretór Jerál Acilino Manuel Branco ba Jornalista sira iha Palasiu du Governu, kuarta-feira 18/01.
Nia haktuir, STAE sei realiza eleisaun ida ne’e ho kualidade ne’ebé ho partisipativu, ne’ebé presiza prosesu lansamentu ne’ebé oras ne’e la’o hela iha nível territóriu nasional, inklui garante mos sidadaun hotu nia direitu iha rai laran no mos rai li’ur.
“Ita haree katak maluk timoroan iha rai li’ur mos hein hela maibé ita seidauk atualiza, portantu ida ne’e mos hanesan servisu ida ne’ebé importante ita prezisa atu foka atu hodi halo mos resensiamentu iha rai-liur. Ida seluk mak ita haree mos ba preparasaun diálogu. Lojístika ita hatene katak sasan hotu ne’ebé ita utiliza ba avaliasaun ne’e kuaze material tinan kotuk nian hanesan tinta material ida ne’ebé sai ema hotu nia preokupasaun dala ruma kuandu to’o ona iha votasaun ne’e ita haree ema dehan vota tiha ona maibé tinta ne’e fase sai lalais.” dehan nia
Nia dehan ema hotupresiza kuidadu atu nune’e bele hetan tinta ne’ebé kualidade no mos seguru, tanba tinta ne’e la’os material ne’ebé fasil atu hetan, tanba ne’e iha aspetu eleitorál ne’e iha nasaun balu de’it make produs tinta.
“Iha regras ne’e abuzamentu ne’e maka’as tebes, tanba ne’e iha tinan kotuk iha eleisaun anterior ne’e governu fazeria hamutuk ho governu sira halo hela atinjisaun ba iha fornesimentu tinta maibé governu mak tau osan hodi sosa tinta ida ho kualidade padraun international ho trine 25% porsentu atu nune’e bele hela kleur iha ema nia liman, fase mos la sai. Tinta ida ne’e tuir kalkulasaun tempu UNDP nian katak fulan haat ka lima sei to’o iha ita nia rai. Ema hotu nia preokupasaun katak partisipasaun eleisaun nian dala ruma votus ne’e barak maibé partisipasaun menus, dala ruma órgaun Eleitoral sira la halo servisu, entaun iha ita nia planu preparasaun oinsá bele reforsa rekursu sira, halo estratejia oi-oin ho nia parseiru tomak,” nia dehan.