Reportajen Joselina dos Santos
Organizasaun Arte Marsiais Neen iha Timor-Leste hanesan Ikatan Keluarga Silat Putra Timor-Leste (IKS-PTL), Persaudaraan Setia Hati Terate Timor-Leste (PSHT-TL), Kmanek Oan Rai Klaran (KORKA), Perisairidi (PD), Seruling Dewata no Pajajaran organiza Kongresu Nasional, hodi hili Prezidente foun ba Organizasaun Federasaun Silat Timor-Leste (FESTIL), ba Períodu tinan 4 objetivu, hodi hametin Festil no kontribui ba Dezenvolvimentu Nasionál.
Iha votasaun ne’e votante sira deside ho pakote A B C no pakote A Ho total 140 votus, Pakote B 80 votus no pakote C 2 votus nune’e Pakote A sai manan na’in hodi lidera ba organizasaun FESTIL ba periodu 2023-2026 ho total 140 votus.
Iha diskursu, Prezidente FESTIL Hermenegildo Custodio da Silva hatete Federasaun ne’e hanesan instrumentu ida tuir estatutu ne’ebe programa nian, iha federasaun organizasaun neen ne’ebe fó fiar atu lidera tinan haat nia laran, se organizasaun ne’e laiha, ema mós laiha tanba ne’e ekipa hakruk husu maluk sira hotu, hodi loke odamatan atu para estrutura bele tama iha laran.
“Durante mandatu, hau sei haree ba sede ne’ebe to’o ohin loron seidauk iha, governu liu husi SEJD sei apoiu hahú husi tinan 2023-2024 sei apoiu ba Organizasaun neen, ami nia estrutura servisu hamutuk ho Prezidente Organizasaun neen hodi tun ba Munisipiu 14 tuir estatutu ne’ebe aprova ona iha FESTIL ba iha nivel Munisipiu”, dehan, Prezidente FESTIL Hermenegildo Custodio da Silva, iha Salaun CNE Kolmera, Sabadu 28/01.
FESTIL sei hamutuk ho Prezidente organizasaun sira, hodi estabelese planu asaun annual no planu tinan 4, ne’ebe sei estabelese hodi hadi’a estrutura ida ne’e, hodi lao ba oin no tuir padraun FESTIL nian no mos sei ba vizita organizasaun sira ne’e kada fulan iha Munisípiu, FESTIL ho nia estrutura tomak sei la foti desizaun ruma, ne’ebe la tuir prosesu tomak iha rai laran liu-liu kona-ba públiku nia kestiona, tanba sa Arte Marsiais ne’e sempre hamosu konflitu, maibe atu rekupera fali no organizasaun neen hamutuk hodi esplika ba no hatudu ezemplu di’ak fali ba públiku.
