Reportajen Umbelina dos Reis
Prezidente Organizasaun Muller Demokrátika (OMD), Fatima Bento Pereira hateten Partidu Demokrátiku (PD), fasilita formasaun ba feto potensiál sira, atu oinsá sira hola papél nu’udar lider komunitáriu nian.
Formasaun ho tema Feto Prontu Lidera ne’e, Prezidente OMD hateten relasiona ho programa PD ne’ebé fasilita feto potensiál sira, katak “ami feto prontu ona kandidata aan ba Xefe Aldeia, Xefe Suku, no Administradora. Husi Aldeia, Suku, Postu, ami preparadu ona atu kompete ba eleisaun, ne’ebé preparadu ona ba lider komunitáriu sira.”
Nia dehan objetivu husi programa ne’e atu fahe informasaun ba feto maluk sira hodi prepara aan ba lidera iha líder komunitáriu nian. “Ami preparadu oinsá fo hanoin ba feto maluk sira iha baze to’o nasionál ne’ebé sedauk tama vida polítika, nune’e feto maluk sira mós bele kompete, envolve aan iha laran, nune’e prepara aan ba eleisaun ba lider komunitáriu nian, ami feto Partidu Polítiku PD prontu lidera iha líder komunitária nian.”
Nia akresenta, da-dauk ita haree membru governu no parlamentu maioria feto barak mak tur iha ne’ebá, tanba ne’e sira ho inisiativa kria programa ne’e atu nune’e Partidu Demokrátiku aban bairua ukun karik sira mos hakarak iha oportunidade ba ukun mos.
“Programa Feto Prontu Lidera ne’e ami iha planu para tenki realiza hotu iha munisípiu 13 inklui RAEOA. Feto maluk sira ne’ebé mak da-dauk ne’e tuir ami nia Programa refere kada aldeia ida ema na’in 22, husi Postu administrativu Vera Cruz, Cristo Rei, Na’in Feto, Dom Aleixo. Total hamutuk ema na’in 88 mak tuir ona programa refere,” nia informa.
Iha fatin hanesan Eis Sekretária Estadu Formasaun Igualdade, Idelta Maria Rodrigues, hateten, relasiona ho Programa husi Organizasaun Muller Demokrátiku, relativamente Programa hirak ne’e servisu hamutuk ho Embaixada Korea ho Ministériu Estatal, aprezenta konabá Programa Dezenvolvimentu rural iha Timor-leste. Nia dehan ne’e oportunidade di’ak ba maluk feto sira tanba Programa hirak ne’e hale’u ona Munisípiu 13 inklui RAEOA, hosi Ministeriu Estatal atu halo sosializasaun ba programa hirak ne’e.
Programa refere realiza ona iha Aldeia 6 no Munisipiu 4, depois planu tuir mai iha tinan ne’e mak sei ba hala’o tan iha baze no aldeia 18 tuir progrma ne’ebé mak iha.
Nia mos hato’o ho programa saída mak feto sira halo relasiona ho promove produtu lokál sira ne’ebé mak iha nível baze ho nia tema “Hahú husi ha’u, hahú husi besik, hahú husi ita no hahú agora”, nia dehan ne’e tema ne’e sinkroniza tebes ba maluk feto sira iha kualker situasaun, nune’e haree ba feto nia servisu hodi tane iha setór hotu-hotu nune’e feto nia misaun ho vizaun nee kontenpla lolos duni.
