Reportajen Umbelina dos Reis
Partidu Demokrátiku (PD) hamutuk ho ONG Belun, Rede Feto, Caucus no ekipa husi Ministériu Estatál fasilita formasaun ba feto potensial sira oinsa lidera iha baze ho tema “Feto Prontu Lidera.”
Ba atividade formasaun ne’e, Sekretáriu Partidu Demokrátiku, António da Conceição hateten PD ohin halo formasaun ba feto potensial sira, atu prepara mós feto sira oinsá lidera, hodi bele sai feto ne’ebé responsabilidade no forsa iha futuru.
“PD realiza formasaun ne’e oinsá feto potensial sira hola parte iha eleisaun Parlamentar 2023. Konvida mós Mana Idelta oinsá prosesu planeamentu importante iha nivel baze. PD iha nia moto katak “hametin ukun rasik aan, harii nasaun husi baze” entaun tenki prepara di-di’ak ema sira ne’ebé hola parte ba responsabilidade vida nasaun nian,” dehan Antonio da Conceição, iha Se Partidu Demokrátiku, Kolmera, Sesta-feira, 28/01.
Nia akresenta, PD realiza formasaun ba loron ohin oinsá prepara feto no partila informasaun hodi hein kalendáriu iha eleisaun Parlamentar nian. Nia dehan, iha sosiedade Timor dala barak, mane sira mak iha dominasaun, nune’e ita hanoin oinsá mak feto sira mós iha oin hodi responsabiliza ba vida nasaun nian.
Alein de ne’e mós nia dehan, oinsá prepara feto ba líder komunitária nian, tanba da-dauk ne’e prepara kandidatu foun ba líder komunitáriu sira, au mezmu tempu prosesoens ba oin kuandu munisípiu sira estabelesidu, feto sira tenki sai papel iha ne’ebé estrutura ezekutivu nian, feto sira iha ona prontidaun atu asume responsabilidade.
PD asosia liu ba joven sira, no husu ba foinsa’e sira tenke projeta aan ba aban bainrua nian. Nia husu ba foinsa’e jerasaun foun sira kontinua lidera, maluk feto balun neebé mak agora da-dauk lidera hela ne’e hatutan hodi kontinua lidera ba oin, tanba responsabilidade ne’e presija praparasaun.
Nia enkoraja mos ba feto potensial sira ne’ebé prepara aan atu lidera, prepara aan ba futuru hodi ukun sosiedade ne’e, tanba Timoroan agora eskola hotu, nune’e lider komunitáriu sira ukun iha sosiedade mós sosiedade sei krítiku maka’as.
Preparasaun polítika Partidu Demokrátiku nian, kareira la hakdasak maibé oportunidade ba ema atu hetan kareira mak susar, ida ne’e responsabilidade parte hot-hotu ho nasaun nian, liu-liu governante sira ne’ebé mak ezerse hela funsaun governu.
Deputado ne’e husu ba juventude nu’udar joven tenke hanoin di-di’ak hodi kria rasik ita nia istória iha Timor hodi kontribui ba nasaun, sé lae ita konta deit Avo sira nia istória maibé ita foinsa’e sira istória laiha.
