Reportajen David da Costa
Abertura Jogu Komunidade Pais Lian Portugés (CPLP), iha loron Sabadu 19 Jullu ne’e, adeptu sira balun tu’ur iha rede leten no balun tu’ur iha estrada maka hare jogu, entre ekipa Timor-Leste ho Ekipa Portugal, tanba ne’e Prezidente Repúblika (PR), José Ramos-Horta preokupa, pódia Governu Timor-Leste hari’i estadiun ida di’ak ho kualidade internasionál, para bele akumula adeptu barak bele akompaña jogu.
Xefe Estadu, José Ramos-Horta, preokupa tanba tinan barak ona Timor-Leste laiha estadiun ida ho nivél internasionál, hodi akumula adeptu sira asiste jogu bainhira iha eventu boot. Timor-Leste ema matenek ba téknika barak loos, maibé rai de’it no fatin sira hanesan estadiun sira ne’e nafatin tuan no at hela.
“Tinan hira nia laran tiha ona, pódia halo tiha ona estadiun ida di’ak, nivél internasionál,” dehan Xefe Estadu Ramos-Horta ba hafoin partisipa jogu volly praia iha Lesidere, Tersa 22/07.
Xefe Estadu hatete, governu tenke buka fatin, foti desizaun, ba halo iha Tibar, Metinaro ka iha ne’ebé deside halo, labele estudu viabilidade, dala ruma Timor espesialista boot estudu viabilidade, depois rai tiha.
“Ne’e duni tinan 23 tiha ona, tanba estadiun atuál ne’e hadia uitoan, mais la nivél internasionál, ita tenke buka rai iha ne’ebé, haree iha Hera, Metinaro, Tibar, Likisa ladun do’ok bele,” Nia hatete.
Direitór Ezekutivu FONGTIL, Valentim da Costa Pinto hatete, estadiun sai hanesan úniku Timor nia kontente, sai hanesan simbólu ba futeboll iha Timor. Maibé Kuaze tinan 10 estadiu ida ne’e la melora, konstrusaun iha faze prosesu konstrusaun hela de’it.
“Ita hatene, bainhira ita halo abertura ba jogu CPLP ne’e hahú ema rihun ba rihun, fatin ne’ebé la to’o, ema tur iha moru sira ne’ebé fó risku ninia seguransa ba adeptu sira ba, ne’e kondisaun ne’ebé ladun. Ita hatudu katak iha animu ne’ebé boot, mais ita nia preparasaun ita ladun máximu”.dehan Direitór Ezekutivu FONGTIL, Valentim hafoin remata konferénsia internasionál kona-ba mudansa klimátika, no Direitus Umanus iha Salaun Canossa Hass Laran Manleuana, Segunda 21/07.
Tanba ne’e “Ha’u hanoin ida ne’e ita hahú ona, espera katak governu bele notas buat ruma ne’ebé presiza hadia tan, nune’e eventu sira Timor bainhira tempu mai fali Timor sai uma na’in, kondisaun sira ne’ebé ita halo ne’e se bele natoon ema hotu-hotu akompaña jogu sira ne’e ho di’ak”.
Tanba tempu sira hanesan ne’e mak tempu oportunu hodi bele enkoraza atu melora modalidade desportu sira iha rai. Maibé ne’ebé kondisaun hanoin ida ne’ebé de’it la perfeitu, mais governu presiza tenke haree fasilidade desportu sira tenke hadia, nune’e modalidade sira ne’e tenke la’o, la’ós futeboll de’it, mais modalidade seluk mós tenke la’o.
“Tinan ida ne’e ha’u haree ne’e fatin la to’o ema sa’e to’o moru, ema tabele sasan sira ne’e ita la organiza ho di’ak. Buat balun ita haree di’ak, tanba animu ne’e iha loos, mais ita la di’ak iha jestaun kona-ba ema sira ne’e atu haree jogu sira ne’e laiha kondisaun ba sira ladun natoon, ladun iha seguransa di’ak,” hatete nia.
Tanba sa’e ba moru monu tun mai, ka listrik mak soké ne’e duni tenke maneja ho didi’ak, bele organiza ho di’ak, ema ne’ebé ba haree jogu sira ne’e ho kontente. Maibé nia bele motiva atu bele halo investimentu di’ak liu tan ba modalidade seluk, liu-liu bele promove di’ak liu tan Timor ninia naran iha mundu, liu husi desportu.
“Governu presiza tenke aselera kompleta estadiun ne’e, tanba konstrusaun kuaze besik la’o ona tinan 10 resin ona, la hotu hela de’it. Ne’ebé bele haree, ha’u hanoin tenke dezenvolve estadiu sira hanesan ne’e iha munisípiu sira nune’e bele fó oportunidade ba joven sira iha area remotas sira ne’e mós bele hatudu sira nia talentu, la’ós konsentra de’it iha Dili,” afirma nia.
Hanesan, estadiun sira iha Gleno, Manatuto ne’e tenke motiva munisípiu sira, nune’e bele halo buat ruma, bele fó oportunidade ba joven sira ne’e, hatudu ninia talentu. Nune’e konsidera hanesan modalidade ida ne’ebé iha prospek di’ak ba rai, se hotu-hotu konsentra mai Dili, mak selesaun sira nune’e hela de’it.
