Reportajen Adroaldo “Saretukau”
Komunidade Postu Administrativu Laclubar, Munisípiu Manatuto husu ba governu foun ne’ebé ukun, tau matan ba sira nia estrada tanba kleur estrada refere sukat no halo observvasaun maibé to’o ohin loron seidauk iha konstrusaun. Alein de ne’e sira husu tau matan mos ba komunidade sira ne’ebé seidauk asesu ba ahí no bee mos.
Komunidade Samuel Cristo Rei Alves (25), hato’o relasiona ho loron ohin 21 de Maiu, festa demokrasia ba eleisaun parlamentar hodi hili ita nia governu foun, tan ne’e nia husu atu governu foun bele hadi’a sira nia estrada ne’ebé kleur oan aat.
“Husi ha’u nu’udar Laclubar oan hakarak liu iha parte dezenvolvimentu nian mak infrastrutura liu-liu iha dalan, tanba dalan hosi postu Laclubar maius ou menus 10 Km hosi área Rulalan mai to’o Laclubar kota ne’e dalan ne’ebé mak aat los, atu fasilita ita nia komunidade sira liu-liu ba sira ne’ebé negosiante atu asesu iha merkadu,” dehan Samuel ba Neon Metin, hafoin ejerse nia direitu de votu iha Laclubar, Domingu, 21/05.
Hanesan Laclubar oan ejije teb-tebes, depois governu foun ida ne’e sa’e, karik kaer ukun bele responde hela nesesidade sira ne’ebé mak agora da-dauk povu Laclubar enfre. Sorin seluk nia nia husu atu haree haree ba bee-moos, tanba iha Laclubar asesu komunidade sira mos sei susar seseu bee moos. Nia mos husu atu tau matan ba eletrisdade tanba iha suku balu ne’ebé mak seidauk asesu ba iha eletrisidade.
Hanesan mos Samuel, Veronica Soares Martins hatete ba governu foun ne’ebé ukun bele hadi’a estrada Postu Laclubar tanba kleur ona seidauk hadi’ak. “Estrada ne’ebé aat, antes ne’e ema sempre ko’alia atu mai hadi’a, mais sukat tiha, maibé depois até a data ita haree realidade dalan nafatin aat, ita atu mai difisil nafatin, espera iha eleisaun ne’e ba oin bele iha mudansa ba estrada.”
Nia mos husu atu governu foun tau atensaun mos ba eletrisidade tama ba to’o área rural sira ne’ebe seidauk hetan eletrisidade. Iha saúde, liu-liu ajente saúde ba iha área rural ne’ebé sei nafatin menus, espera ba oin bele hadi’a, iha ospital sira fasilidade makína iha laboratorium, kama no seluk.
Nune’e Alberto de Sousa Soares (21), Laclubar oan ida dehan “ha’u nia preokupasaun ba iha infrastutura ba iha ita nia Postu Laclubar ida ne’e, ida primeiru tau prioridade liu mak estrada ne’e, tanba liu hosi estrada ne’e mak bele fasili aktividade iha setor agrikultura nian, ba merkadu no negosiante sira, tanba agora ne’e iha fallansu iha estrada, entaun impede ita nia sasan fa’an iha sidade, entaun impede fali ita nia negosiante sira.”
Nia hatutan, segundu mak haree ba bee mos, tanba iha Postu Laclubar iha aldeia no suku balu ne’ebé mak sei halerik ba bee moos. Terseiu mak eletridade, tanba Laclubar iha suku neen maibé iha suku balu mak seidauk asesu ba iha eletrisdade.
“Karik govenru tinan ida ne’e sa’e tuur iha govenru, husu atu tau matan netik iha Postu Laclubar atu nune’e bele hadi’a ami nia estrada no seluk tan.” Dehan Alberto.
