Home Saude Moras Lepra Iha TL kontinua Aas , Munisípiu 4 Mak Hetan Númeru...

Moras Lepra Iha TL kontinua Aas , Munisípiu 4 Mak Hetan Númeru Boot

414
0
membru Boar Misaun Lepra Timor-Leste, José de Araujo Verdial. [Foto: Santina | 21.01.2022]

Reportajen Santina Lucia da Costa

Misaun Lepra Timor-Leste (MLTL) halo enkontru ho espoza Prezidente Repúblika, Cidalia Lopes Nobre Mouzinho Guterres, husu apoiu atu bele sensibiliza informasaun ba públiku, relasiona ho moras lepra ne’ebé komunidade sira afeta.

Hafoin enkontru membru Boar Misaun Lepra Timor-Leste, José de Araujo Verdial, hateten, Objetivu mai enkontru ho Espoza Prezidente Republika, atu husu tulun mós espoza, para atu bele halo sosializasaun atu bele sensibiliza informasaun ba iha publiku kona-ba moras lepra ninian.

“Ami mai ne’e mós lori ho dadus sira, hanesan ita hatene iha tinan 10 liu ba momentu ne’eba Prezidente Republika, Dr. José Ramos Horta deklara ona katak, elimina moras lepra iha Timor-Leste, maibé depois de ida ne’e, tinan hira la’o mai ita haree katak, husi serbisu ne’ebé mak misaun lepra halo, vizita iha komunidade sira,  hamutuk ho serbisu saude ninian ita deteta katak, moras lepra ne’e sei iha nafatin, ninia numeru ne’e tinan ba tinan aumenta nafatin.” Hateten José de Araujo Verdial iha Palasiu Prezidensial, Nicolau Lobato, Bairu-Pite, 21/1.

José hatutan orsamentu ne’ebé aloka iha Ministériu Saude mós la dun fó prioridade ba moras Lepra ninian, tanba ne’e mak husu tulun espoza Prezidente Republika, para bele fó apoiu liuhusi sensibilizasaun,  bele tulun ita nia maluk sira ne’ebé mak afeita moras Lepra,

“Ita haree mós iha komunidade, maluk sira ne’ebé mak afeita moras Lepra ne’e hetan stigma iha komunidade sira, entaun halo sira dalaruma la hakbesik-an ba iha Sentru Saude, sira mós tulun husi Familia sira”, dehan Jose iha palacio prezidénsia

José akresenta moras Lepra ne’e hanesan mós moras hadaet, maibé nia la naran hadaet, nia hadaet wainhira ita nia imunidade ne’e tun, nia tempu para atu hadaet ne’e presija tempu fulan 6 to’o tinan 2 mak moras ne’e foin bele hadaet.

Nia dehan moras ida ne’e mós bele kura, mediku sira hateten, moras ida ne’e mosu ema lahatene, tanba nia mosu ho hena mutin ne’ebé mak ema la senti ka hena mean ne’ebé mak ema la senti, nia moras ka katar, maibé kuandu ita husik de’it la hetan tratamentu sedu, nia rezultadu mak afeita ema hetan difisiensia matan, difisiensia liman, no bele mós mosu difisiensia mental.

Nia afirma dadus ne’ebé mak iha Timor-Leste laran tomak tinan 2020 nian, hamutuk 122, hosi numeru ne’e, Munisipiu haat mak numeru aas, hanesan, Munisipiu Baucau 31, Dili 44, Manatuto 10 no Oe-cusse 19.

José Araujo haktuir husi enkontru ne’e hetan rezultadu pozitivu tebes, tanba Espoza mós prontu atu bele fó tempu para fó mós mensajen sira atu bele partisipa iha sosializasaun sira ne’ebé tuir mai wainhira ita halo, no Espoza mós hanoin katak, bele enkaisa mós sensibilizasaun iha atividade espoza Prezidente Republika ninian.

Medida ne’ebé mak presija halo maka, wainhira ita iha sinais sira hanesan hena mutin ka hena mean ne’e, ita presija hakbesik-an ba sentru saude para atu bele halo teste, wainhira detekta sedu bele hetan tratamentu sedu, bele kura moras ida ne’e.

Nia konklui bainhira atu prevensaun ba ema hetan moras lepra hemu Aimoruk Multi Drug Therapy (MDT) mak fó ba  maluk sira ne’ebé hetan moras lepra, ne’e aimoruk gratuita laiha kustu ruma atu selu ida ne’e.

Print Friendly, PDF & Email

LEAVE A REPLY

Please enter your comment!
Please enter your name here