Reportajen Joanina Casamiro
Liuhusi konferensia imprensa matebian José Bernardo nia Inan Regina De Jesus Soares, hateten familia matebian Jose Bernardo de Jesus Soares, hamutuk ho Juventude Audian Blok 3 kontinua ezije, hodi buka hatene loloos kronolójia José Bernardo nia mate ne’e, tanba sa durante ne’e rezultadu investigasaun familia seidauk hatene loloos motivu hosi Jose nia mate.
“Ha’u sei ba buka nafatin to’o hetan nia rezultadu, ha’u sei tama sai nafatin Polisia Sentifika Investigasaun Kriminál (PCIC) Ministru Publiku hodi buka nafatin, tanba inan ha’u laran moras tanba ha’u nia oan ba mate nonok hela iha Sela laran, familia ami sente triste mate maibé PNTL nain 9 ne’e ba servisu fali tiha ona, fulan rua deit sira hahú fali ona sira nia servisu, sira kontente fó han sira nia Fen no oan, ha’u hakarak hatene lolos ha’u nia ona nia mate ne’e,” Dehan Matebian nia Inan Regina, liuhusi konferensia Imprensa iha rezidensia matebian nian iha Audian Blok 3, Sabadu 28/01/23.
Nia dehan sira sei kontinua buka lia-los ba Jose Bernardo de Jesus nia mate, tanba sa mak nia mate iha sela laran justisa ne’e la’o to’o iha ne’ebé ona. Ban
” Ha’u Inan rasik lori nia ba hosi ne’e i’is di’ak hela, maibé ha’u fila kotuk liu oras 4 derepenti rona katak nia mate iha sela laran, ne’e tanba sa inan ha’u hakarak hatene nia kronolojia hosi Jóse Bernado nia mate ne’e liuhosi saida mak nia mate. Tanba Autopsia ne’e mós nunka fó sai katak Jose Bernado nia mate tanba hanesan ne’e mós lae, sira la fó hatene to’o loron ohin atu besik tama ona ba fulan 5 ona maibé ami familia la simu resultadu ruma, hau inan la’o tun sa’e mos la rona buat ida Kona-ba ha’u nia oan nia mate inan ha’u triste no laran moras,” Nia espresa nia sentimentu.
Nia hatutan, familia ba ezije sira dehan hein de’it, maibé prosesu ne’e la’o to’o iha ne’ebé ona, familia hakarak hatene nia prosesu ne’e to’o iha ne’ebé ona, tanba tama ona ba fulan 5 ona ne’e, la iha resultadu, maibé ema ne’ebé sona iha Habibie nia halai to’o tiha iha Same kaptura lalais de’it, iha Elemloi mos hanesan ema ne’e sira kaptura lalais de’it, nomós iha Maliana mós hanesan ema sira ne’e mai hotu ona, mas tanba sa josé nia mate seidauk iha rezultadu.
“Tanba sa mak ha’u nia oan ne’e, mate iha sira nia odamatan oin ne’e, ema ida be hein nia ne’e iha ne’ebé to’o ohin loron resultadu la iha, tanba ne’e mak Inan ha’u nia laran ne’e moras loos, Justisa ba ema hotu laos ba ema bo’ot de’it no povu ki’ik sira hanehan tiha,” tenik nia.
Ho ida ne’e, familia ezije nafatin ba Komandante PNTL nia membru sira, fó servisu lolos, “ha’u nia oan ne’ebe mate iha sira nia liman ne’e atu husik hela de’it, entaun nia Komandante geral ne’e atu halo saida ne’e, atu haree de’it problema sira hanesa ne’e ka oinsa, entaun sira uza farda ne’e saugati de’it ka, nia lori ha’u nia oan ba oho tiha, sira nia lian la iha tiha de’it sira la koalia buat ida mai ami familia”.
