Reportajen David da Costa
Hafoin horseik asegura sidadaun Xinez nain 21 iha Hera, ohin Komandu Polísia Nasionál Timor-Leste (PNTL) Munisipiu Dili, liu hosi Eskuadra Cristo Rei, hamutuk ho Servisu Migrasaun, Diresaun Servisu Informasaun Polísia (DSIP) junta Forsa Polisia (FP), asegura tan sidadaun estranjeiru Xinez nain 11 iha hera mota ki’ik, ne’ebe deskunfia envolve iha atividade rede scam call Center jogus ilísitu online.
Tuir informasaun ne’ebe Neon Metin sita husi Pagina Facebook Sevisu Relasaun Publikas (SRP) PNTL nian, hateten, operasaun ne’e realiza tanba iha suspeita katak grupu refere envolve iha atividade jogu ilísitu online no Scam Call. Ekipa servisu konsege identifika no dezmantela rede ida ne’ebé deskonfia hala’o atividade ilegal sira iha área Hera.
“Durante operasaun, autoridade sira mós apreende evidénsia oioin, inklui ekipamentu eletróniku no teknolojia avansada ne’ebé deskonfia uza hodi hala’o atividade ilegal refere,” dehan iha komunikadu Imprensa ne’ebe Neon Metin Asesu iha Pagina Ofisial Servisu Relasaun Publika hosi PNTL, Kuarta 22/07.
Hafoin dezmantela fatin ne’e, sidadaun estranjeiru nain 11 ne’ebé asegura ona halo kedas prosesu identifikasaun no sei submete ba investigasaun. Bainhira investigasaun remata, kazu ne’e sei haruka ba Ministériu Públiku atu kontinua prosesu tuir lei ne’ebé vigora.
Hodi hametin seguransa públika no kombate krime organizadu iha Timor-Leste, Governu liuhosi Ministériu Interior apela ba komunidade atu fó informasaun ba autoridade kompetente bainhira haree ka deskonfia atividade ilegal sira iha área ne’ebe besik.
Rekorda fali katak, Konsellu Ministrus aprova ona projetu Rezolusaun Governu, ne’ebé aprezenta hosi Ministru Prezidénsia Konsellu Ministrus, Agio Pereira, ne’ebé determina kanselamentu lisensas ne’ebé fó ba operasaun jogus no apostas online.
Rezolusaun Governu ida-ne’e mós determina kanselamentu prosedimentu lisensiamentu sira ne’ebé la’o hela no bandu lisensa foun sira ba tipu atividade ida-ne’e, haree ba risku sira ne’ebé identifika ona ba nasaun nia seguransa, estabilidade sosiál, integridade ekonómika no reputasaun internasionál.
Ministru tutela, hamutuk ho forsa seguransa sira, sei tau matan ba implementasaun medida sira ne’ebé aprova ona hosi Rezolusaun Governu ida-ne’e. Diploma ne’e mós estabelese revizaun ba lejizlasaun aplikavel, liuliu Dekretu-Lei n. 6/2016, loron 20 fulan-abríl, ne’ebé regula setór ne’e.
