Reportajen Joselina dos Santos
Reprezentante Konselleiru Partidu Kmanek Haburas Unidade Nasionál Timoroan (KHUNTO), ohin Ssubmete ona lista kandidatura ba Tribunal Rekursu (TR), hodi bele hetan legalizasaun atu kompete iha eleisaun parlamentar tinan ne’e.
Reprezentante Konselleiru partidu KHUNTO, Marito Magno hateten objetivu prezensa Partidu KHUNTO nian ohin iha Tribunal Rekursu ne’e mai submete lista kandidatu deputadu ne’ebé sei partisipa iha eleisaun parlamentar períodu 2023-2027.
“Iha lista ne’e laiha impedimentu ruma, nune’e ami submete ba tribunal iha loron hira nia laran no loron sanulu nia laran tuir Lei, Tribunal Rekursu sei verifika no sei hato’o, karik dokumentu hirak ne’e balun la kompletu mak Tribunal sei notifika ba reprezentante kandidatura nia atu partidu bele hadia maibé ami fiar katak partidu KHUNTO prenxe ona rekizitu tan ne’e ami hatama ho kuidadu”, dehan Reprezentante Konselleiru Partidu KHUNTO, Marito Magno iha edifísiu Tribunal Rekursu Dili Kaikoli, Tersa 14/03.
Nia dehan, lista efetivu ne’e 65 no suplementu nain 25 hamutuk 90, sira iha ema foun nune’e iha deputadu sira antigu nian ne’ebé institusionál nian sei nafatin, atu nune’e partidu KHUNTO iha nia partisipasaun debate fiskalizasaun no hala’o nia mandatu ho di’ak.
“Husi numeru efetivu ne’e ami iha igualdade jéneru, tanba ami iha 23 pessoas femenina, nune’e mos iha suplente 14 pesoas femenina nune’e ami liu tiha numeru ne’ebé lei preve. kona-ba kampaña ami preparadu tanba estrutura partidu ne’ebé hala’o nia servisu nomós membru no militante sira konseleiru hala’o servisu iha baze ne’e prepara antes ona”, nia informa.
Nune’e Partidu politikus neebé antes Rejistu ona iha Tribunal Rekursu mak Hanesan , partidu Frente Mudansa (FM) partidu Movimentu Libertasaun Povu Maubere (MLPM), Partidu UNDERTIM, Partidu Sosialista de Timor (PST), no partidu Koligasaun AND.
Enkuantu tuir data tentativa ne’ebe Tribunal Rekursu anunsia katak Partidu Politiku sira iha tempu atu submete lista kandidatura ba Tribunal Rekursu ,válidu to’o loron 15 Marsu iha tuku 17.00.
