Reportajen Joselina dos Santos
Relasiona ho atividade individual ne’ebé membru organizasaun Arte Marsiais Persaudaraan Setia Tera Hati (PSHT), no Ikatan Keluwarga Silat, Putra Timor-Leste (IKS P.TL), komete iha fatin-fatin mak Komisaun Reguladora Arte Marsiais (KRAM), Servisu hamutuk ho Lider PSHT no IKS, PTL hodi apela ba membru Arte Marsiais sira iha Timor-Leste hodi kontribui paz no estabilidade seguransa iha Timor laran, atu nune’e labele hamosu konflitu no violénsia, liu-liu iha loron Eleisaun Suco no loron matebian nian.
“Aktus kriminal ne’ebé hola parte ba responsabilidade individual entre menbru organizasaun rua ne’e krime, nune’e ami konvida lider nain-rua husi PSHT no IKS atu fó mensajen ba membru sira hamutuk ho IX governu hodi kontribui ba prosesu dezenvolvimentu desportu nian iha rai laran,” dehan, Prezidente KRAM Octavio da Conceição iha Salun SEJD, kinta 26/10.
Iha fatin hanesan, Prezidente Organizasun Arte Marsiais PSHT Baltazar Lopes husu ba membru tomak liu-liu ba koordenadór munisipiu sira atu halo preparasaun pasiensia kalma ho mantein pozisaun, tanba dadaun ne’e iha tempu matebian nomós besik festa natal. Nune’e hatudu ezemplar diak no lori organizasaun nia naran no tenke Unidus ka kria ambiente fuarak.
“Husu membru sira problema pesoal labele liga ba arte marsiais, maibe tenke dezenvolve nasaun liuhusi atividade desportiva nian. Tanba Organizasaun mos iha regras atu suspende ba membru sira ne’ebé halo krime, nomós fó sansaun primeiru no segundu maibe kaundu to’o terseiru ami foti medidas rigozu mak nia labele uza atributu, labele treinu no la hola parte iha arte marsiais refere no sai ema bain-bain”, nia dehan.
Iha Parte seluk, Prezidente Organizasaun Arte Marsiais IKS. PTL Silvestre Xavier Sufa informa ba membru IKS katak huhú ohin hotu-hotu tenke hakribi violensia hodi kria paz no estabilidade iha fatin ne’ebé deit. Tanba ema moria iha sosiedade nia leet, tenke hakruuk ba lei no hakruk ba autoridade sira no kria paz ho arte marsiais sira seluk.
“Karik problema privadu husu atu rezolve maske la koñese malu, tanba organizasaun la hanorin membru sira atu halo krime no violensia iha fatin ne’ebé deit. Tenke garante unidade ho paz no estabilidade iha loron eleisaun suku ne’ebé sei monu iha loron 28 fulan Otumbru, nomos ba loron matebian nian, nune’e husu atu hakmatek hodi bele tuir kompetisaun atividade desportiva ho profisional iha fulan Dezembru”, nia esplika.