Reportajen David da Costa
Projetu expansaun Aeroportu Internasionál Prezidente Nicolau Lobato ho valor US$239 millaun la’o tuir planu no obra ne’e sei presiza tempu to’o tinan 2028 mak foin remata hotu. projetu ne’e enfrenta dezafiu sira relasiona ho disponibilidade terrenu no koordenasaun entre komponente obra oioin, mas progresu konstrusaun infrastruktura prinsipál sira kontinua hela.
Iha Komunikadu Imprensa ne’ebe Neon Metin asesu katak, ohin Konsellu Ministrus hala’o sorumutu iha Auditóriu Kay Rala Xanana Gusmão, iha Ministériu Finansas, Dili, no hahú sorumutu ne’e ho aprezentasaun husi Ministru Transportes no Komunikasoins, Miguel Marques Gonçalves Manetelu, kona-ba progresu serbisu dezenvolvimentu no expansaun ba Aeroportu Internasionál Prezidente Nicolau Lobato.
Projetu ne’ebé dezenvolve iha parseria ho Banku Aziátiku Dezenvolvimentu (ADB), Ajénsia Kooperasaun Internasionál Japaun nian (JICA) no Governu Austrália liuhosi Australian Infrastructure Financing Facility for the Pacific (AIFFP).
Iha projeitu modernizasaun inklui mos pista, taxiways, área estasionamentu ba aviaun, torre kontrolu, terminal pasajeiru nian no infraestruturas apoiu oioin, ho investimentu totál revistu maizumenus dolar amerikanu millaun 239.
Nune’e mos MTK aprezenta mós progresu hosi serbisu sira ne’ebé la’o hela, inklui konstrusaun ba taxiways foun, área estasionamentu ba aviaun, estrutura protesaun tasi-ibun nian, no instalasaun téknika sira.
Maibé governu mós hasoru hela dezafiu prinsipál sira relasiona ho disponibilidade terrenu no koordenasaun entre komponente oioin hosi projetu ne’e.
Kalendáriu jerál prevee finalizasaun tuir faze hosi obra sira to’o tinan 2028, hodi bele reforsa kapasidade operasionál no padraun sira seguransa nian ba aeroportu internasionál prinsipál iha nasaun ne’e.
