Reportajen Zevonia Vieira
“Hau trauma rona hodikalan iha video, labarik ida hakilar “apá”, halo hau rekorda jovens sira hakilar, “apá….amá…hau mate ona”, wainhira ema sona no oho joven sira iha rate Santa Cruz”. Gregorio Prezidente Committee 12 Novembru.
Asaun husi ekipa Sekretária Estadu Asuntu Toponómia Organizasaun Urbana (SEATOU) ne’ebe kontinua sobu vendedór kiik sira faan modo iha estrada ninin sira, no iha loron 03 Setembru hamosu asaun hodi estraga vendedór sira nia sasan hirak ne’ebe sira faan, ne’ebe halo direita husi ekipa SEATOU iha Kampung Baru Comoro.
Husi asaun ne’ebe ekipa SEATOU halo hasoru vendedór sira no viral iha plataforma medis sosial, hamosu reazen makaas husi públiku, tanba ne’ebe parte husi violasaun direitu umanus.
Liuhusi telefone Neon Metin halo entrevista ho Prezidente Autoridade Munisipiu Dili, Gregorio Saldanha ‘Mouris’ hodi klarifika konaba akontesimentu ne’ebe halao husi parte SEATOU nian. Ba Neon Metin Prezidente Autoridade Gregorio hateten katak husi parte Prezidente Autoridade Munisipiu Dili, nungka fo orden ba funsinariu Autoridade Munisipiu Dili (AMD), hodi ba sobu no estraga vendedór sira nia sasan, maibe atuasaun violenta ne’e halo husi SEATOU.
“Hau lae no nunka fo orden atu funsionáriu AMD sira ba sobu no estraga “povu” vendedor sira nia sasán. Maibé atuasauan violenta ne halo husi Excia SEATOU nia orden ba funsionáriu sira” dehan Gregorio Saldanha ba Neon Metin via telefone, 04/09
Gregorio ne’ebe nu’udar ema rezisténsia afirma katak hanesan povu sofredór nia oan, hanesan ema rejisténsia iha tempu uluk, no hanesan PAM oras ne, “hau la konkorda ho hahalok at sira ne’e”.
Nia hatutan kaer nu’udar kargu PAM, kondena, protesta no kritika makaas hahalok brutalizmu, vandalismu no premanismu hasoru povu nebé uluk sai vítima husi Indonézia sira nia hahalok at, no to’o ohin loron sira sei vítima nafatin husi nia autoridade sira rasik.
“Ba hau, husi uluk iha tempu rezisténsia too agora, LAIHA TOLERÁNSIA ba brutalismu ka violénsia”, hateten Mouris.
Bainhira Neon Metin konfirma konaba diskusaun publiku katak husi hahalok violentu ne’ebe halo husi ekipa konjuta, sei hamosu PAM nia imajen, no balun husu atu rezigna an husi kargu ne’e? ba Neon Metin Prezidente Autoridade Gregoriu hatan katat hanoin no tetu ona iha tempu hirak ba kotuk, no sei to’o nia tempu hodi foti desizaun ho loloos.
“Hau tetu ona tempu hira ba kotuk, no sei too tempu lolós hodi foti desizaun lolós”, deklara Mouris
Konaba knaar husi PAM nian hodi kontrola sidade Dili, maibe iha terenu SEAOU mak lidera, ba ida ne’e Gregoriu hateten katak pergunta ne’ebe sua exelénsia SEATOU mak tenke hatan, tanba to’o ors ne’e PA simu deit orden ho informasaun, maibe laos halo koordenasaun serbisu ho SEATOU. Maibe Prezidente Autoridade dehan maibe orientasaun husi Ministru no Vise Ministru Administrasaun Estatal, konaba SEATOU halo ne’e nudar PAM nian responsabilidade no submete direita ba Ministru.
Ho situasaun ne’ebe akontese dadauk Prezidente Autoridade Munisipiu Dili, enkoraja vítima sira hodi buka advogadu, hodi tulun sira hato’o keixa ba Ministériu Públiku.
“Hau trauma rona hodikalan iha video, labarik ida hakilar “apá”, halo hau rekorda jovens sira hakilar, “apá….amá…hau mate ona”, wainhira ema sona no oho joven sira iha rate Santa Cruz”. Gregorio Saldanha ne’ebe nudar mos Prezidente Committee 12 Novembru.
SEATOU hala’o planu organiza Dili tuir polítika Nonu Governu nian hodi sai moos, liuhusi muda komunidade sira ne’ebé uza rai estadu ka rai públiku nian hodi halo negósiu ou hela fatin, ne’ebe lao ona atu besik tinan ida nia laran.
Eviksaun ne’ebe hala’o mos iha ambitu Amo Papa Fransisku ne’ebe hela semana ida nia laran sei to’o iha Dili, husi loron 9 – 11 Setembru 2024.
