Reportajen David da Costa Gusmao
Iha loron aniversariu Cruz Vermella Timor-Leste (CVTL) ba dala 21, Sekretáriu Estadu Komunikasaun Sosial (SEKOMS) husu azuda CVTL atu halo kampaña vasina, para sidadaun sira hotu bele iha konsensia hodi tuir vasina, tanba luta agora mak kombate COVID-19, so dalan úniku maka halo vasinasaun.
Sekretáriu Estadu Komunikasaun Sosiál (SEKOMS), Mericio dos Reis Akara hateten, iha situasaun difisil hanesan COVID-19, governu husu Cruz Vermella sira nia partisipasaun makaas liu tan, liu-liu atu ajuda governu atu halo kampaña vasina.
“Ita nia luta mak kombate COVID-19 iha ita nia rai, so dalan úniku maka ita halo vasinasaun,” dehan Akara hafoin partisipa serimónia aniversáriu Cruz Vermella de Timor-Leste (CVTL) ba dala 21, Tersa 22/06.
Nia haktuir iha oportunidade ida ne’e husu nafatin CVTL nia kontribuisaun makaas liu tan, hodi enkoraja sidadaun sira hodi bele partisipa iha vasinasaun.
“Nafatin husu CVTL hodi enkoraja nafatin ita nia sidadaun sira hotu para bele partisipa iha vasinasaun, espera iha Novembru ita bele relata uitoan bainhira 70% ka 80% ita nia populasaun bele hetan ona vasinasaun, ida ne mak governu nia rekomendasaun ba ita boot sira”, nia rekomenda.
Iha fatin hanesan, Prezidente Cruz Vermella de Timor-Leste (CVTL), Madalena Hanjam hateten iha situasaun COVID-19 sira mos apoiu rekruta pesoal saude tanba ospital sira presiza tebes.
“ospitál presiza ema 400 atu bele halo protesaun shift maibe ida ne’e kuandu la to’o, Cruz Vermella tenke serbisu apoiu, ne’e duni ami rekruta mediku, enfermeiru, aliadu, ho voluntariu enjeñeiru sira balun ne’ebe mak iha tékniku badain sira ,atu ajuda hadia odamatan no sintina”, nia hakotu
