Reportajen Juvinal Cabral
“Hau sei foin serbisu fulan lima, salario $250.00 maibe tuir informasaun cafe Atsabe sei hetan eviksaun», Elsa
Elsa Teresa Ramos hanesan Jestora (Manager) iha Café Atsabe nia haktuir servisu foin fulan lima kada fulan nia hetan salariu $250.00, sira mos rona ona informasaun katak fatin ne’ebe sira servisu ba ne’e mos sei hetan eviksaun husi estadu ne’ebe lidera husi Secretario de Estado dos Assuntos Toponimia e Organização Urbana (SEATOU) traballador sira sente lakon oportunidade servisu ne’e
“Nu’udar joven ha’u sente triste oituan tanba ha’u lakon fatin ne’ebe servisu ba, maibe hanesan joven ida ami koopera ho ita nia estadu espera bele fo fatin dignu ba ami atu nune’e ha’u ho staf sira halo servisu ba nafatin,” dehan Elsa iha nia servisu fatin Café Atsabe, Fomento 30/04/2024
Servisu ne’ebe sira halo loro-loron mak parte kafetaria sira simu kliente ho atendimentu di’ak hodi halo promosaun nune’e ema hotu hakarak hemu nafatin sira nia café, maibe iha tempu badak mak hetan duni eviksaun fatin servisu ne’e sira sente lakon esperansa, espera ba oin sira bele hetan fali fatin ruma hodi sira bele kontinua servisu hanesan baibain
Iha fatin hanesan barista café Atsabe Adelino Marchal Pinto hatutan, nia servisu iha kafetaria ne’e durante tinan ida ona nia sente orgullu tanba bele hetan oportunidade servisu ne’e kada fulan nia bele hetan salariu $150.00 hodi uja ba nesesidade uma laran
“Bainhira governu halo eviksaun ba fatin ida ne’e ami barista no staf sira sente triste tebes tanba servisu ida ne’e mak di’ak ona ba ami se sai tiha husi ne’e ami servisu la iha ona, bele karik governu kria fali fatin ida ba ami hodi kontinua servisu ne’e” dehan barista Adelino iha nia servisu fatin Café Atsabe, Fomento 30/04
Iha fatin hanesan nain ba Café Atsabe, Mariano da Costa Alves haktuir hanesan Timoroan iha setor café hakarak atu sai nain ba produto rasik nune’e mak harii Café Atsabe refere iha tinan 2017
“Fatin ida ne’e fo servisu ba joven nain 13 ne’ebe mai husi munisipiu la hanesan, salariu fo tuir sira nia servisu ne’ebe maki ha hanesan servisu ita iha ne’e maneger, finansas no barista salariu ba sira tuir estandar SEFOPE nian masimu $200.00, minimu $130.00”, dehan Mariano iha nia fatin Café Atsabe, Fomento 30/04
Nia hateten sira rona informasaun duni katak Café Atsabe mos hetan eviksaun husi governu, nia sente triste bainhira fatin refere taka joven sira ne’e lakon servisu maibe hanesan joven koopera nafatin ho estadu hodi dezenvolve nasaun ida ne’e
“Ita hotu koopera no ha’u hamutuk ho staf no to’os nain sira husu ba nai ulun sira haree mos situasaun ne’ebé ami hasoru, ida mak se bele iha dalan seluk hodi uja fatin ne’e ba atividade seluk karik iha espasu publiku bele fo ba ami hodi kontinua ami nia servisu” nia kestiona
Nain ba Café Atsabe ne’e esplika nia nafatin iha responsabilidade ba traballador maske sira hasoru difikuldade nia sei buka solusaun nafatin ba staf sira hodi kontinua servisu ida ne’e, nia mos nafatin halo linha kordensaun ba ministeiru relevante sira hodi fo espasu ka kondisaun naton ba sira
“Ami halo ona komunikasaun parte relevante liu hosi submete karta ba sira mai ko’alia ona ami futuru ba fatin ida ne’e espera iha solusaun ho di’ak, fatin refere kona ba arendamentu ami seidauk halo maibe kada fulan selu taxa ba atividade ne’ebé ami halo ne’e sempre” dehan Mariano
Fatin hanesan kafetaria ne’e iha fatin seluk mos iha hanesan Hudi-laran no Palapaso maibe ne’e ki’ik, so ida Fomentu sai hanesan odamatan boot ba prosesu café ne’ebe halo iha foho no sai sentru ba formasaun, treinamentu, no atividade seluk tan
“Agora ha’u seidauk iha hanoin para atu lori fatin ida ne’e ba iha fatin seluk, tanba investimentu ne’ebe mak iha tinan hira mak ami lakon ba ida ne’e entaun ita seidauk iha hanoin ida atu muda fatin ne’e ba ne’ebé, maibe nafatin iha linha koordensaun ba ministeiru sira bele haree ami nia atividade ne’e hodi fo benefisiu ba ita nia ema, komunidade no setor agrikultura café nian, nune’e sira bele fo espasu seluk”
