Reportajen Silvino Freitas
Eis Prezidente da Republika atuál Prezidente partido FRETILIN, Dr. Francisco Guterres ‘Lu-olo’ konsidera segundu kongresu Partido Libertasaun Popular (PLP), atu junta forsa hodi salva Timor-Leste liuhusi situasaun ne’ebé dadaun ne’e povu infrenta, nune’e PLP sei hamutuk ho partido hotu, atu salva Timor Leste, nune’e prezidente PLP Taur Matan Ruak husu delegasaun sira atu foka ba solusaun iha prosesu salva Timor Leste.
Eis PR Francisco Guterres ‘Lu-olo’ dehan, kongresu PLP ne’e hatudu refleksivu tebes liuhusi tema kongresu ne’ebé dehan ‘ Mai Ita Hamutuk Salva Timor Leste’ nune’e tema ne’e hatudu ba realidade ne’ebé dadaun ne’e akontese iha Timor Leste, kongresu ne’e atu lori PLP hakat ba oin ho postura polítika ida hamutuk ho sira seluk atu bele salva Timor Leste.
“Hau dehan ita ne’e tanba iha ona kontra teze, se segundu kongresu ida nee hatene hamutuk atu salva Timor Leste nia kontra teze maka ha’u bele hateten mai ita hamutuk oho tiha Timor Leste” dehan Lu-olo iha kongresu PLP iha salaun Mahoka Dili, (15/02).
Eis Xefe Estadu ne’e konsidera líder PLP Taur Matan Ruak hanesan ninia kompaineru da luta ne’ebé hatene no koñese hela konjuntura atual no saida mak PLP bele kontribui hamutuk ho sira seluk atu bele salva duni Timor Leste, nune’e delegadu sira ne’ebé mai husi munisípiu sira sei lori material husi idadiak nia diresaun hodi diskuti nune’e bele difini postura ba ohin, hodi sai partido ho pozisaun ne’ebé klaru no forte hamutuk ho sira seluk salva Timor Leste.
“Partido FRETILIN ne’ebé ha’u rasik reprezenta hakarak husik hela ami nia felisitasaun no parabéns ba partido PLP ho estrutura no delegadu sira hotu ne’ebé ohin atu hakat ba oin ho firmeza no konviksaun ne’ebé metin hodi salva Timor Leste” dehan Lu-olo.
Entretantu Prezidente PLP Taur Matan Ruak, enkoraja nafatin militante husi partido laran atu tau nasaun ho povu no liuhusi kongresu ne’e atu labele konsentra ba problema maibé konsentra ba solusaun.
“Ema ne’ebé harii partidu mak ema ne’ebé hakarak hanesan ha’u nia hanoin mak saida primeiru Timor segundu partido terseiru maka individual, sei imi hanoin primeiru hau segundu hau terseiru ha’u depois mak nasaun ne’e ita problema” tenik prezidente PLP Taur Matan Ruak, iha kongresu PLP iha salaun Mahoka Dili, (15/02).
Nia dehan tan, liuhusi kongresu ne’e iha asuntu barak ne’ebé sei ko’alia maibé tenke fokus ba solusaun konsolida an loke odamatan ba ema hotu ne’ebé hanoin ho mehi ne’ebé hanesan ita hodi salva ita nia nasaun, hodi hanoin katak dezenvolvimento ne’ebé ita halo ba benefísiu ema nian.
