Reportajen David da Costa
Reprezentante Organizasaun Mundiál Saúde (OMS), Arvind Mathur, ohin hasoru malu ho Prezidente Repúblika (PR), José Ramos Horta, hodi hato’o katak iha fulan-fevereiru tinan ida ne’e, Timor-Leste sai uma-na’in ba konferénsia internasionál kona-ba mudansa klimátika iha sudeste aziátiku.
“Ohin enkontru ho Prezidente Repúblika atu hato’o katak Timor-Leste sei sai uma-na’in ba konferénsia internasionál ida ne’ebé tékniku liu kona-ba Mudansa Klimátika iha Kontinente Azia no Timor-Leste sei sai uma-na’in ba konferénsia boot ida ne’e, no komferénsia ne’e sei hala’o iha loron 24-28 fevereiru, ha’u hato’o ida ne’e tan” dehan Reprezentante Organizasaun Mundiál Saúde (OMS), Arvind Mathur, ba jornalista sira bainhira remata enkontru ho Prezidente Repúblika José Ramos-Horta iha Palásiu Prezidensiál Bairu-Pite, Kinta 16/01.
Nia hatuir, Reprezentante OMS hato’o ida-ne’e tanba haree husi kompromisu Prezidente Repúblika José Ramos-Horta no povu Timor-Leste tomak nian kona-ba asuntu mudansa klimátika.
“Iha oprtunidade ida ne’e, ha’u mós atualiza ba Prezidente kona-ba serbisu regulár sira saúde nian ne’ebé ita hala’o ona, inklui esforsu oinoin ne’ebé halo ona, prosesu halo levantamentu ba moras sira inklui progresu halakon malária iha TL,” nia hateten.
No konferénsia internasionál kona-ba mudansa klimátika sei ko’alia kona-ba prátika diak sira ne’ebé maka nasaun sira seluk halo, hanesan oinsá maka bele redus CO2, nune’e mos sistema saúde ne’e rezilente ba mudansa klimátika ne’e rasik.
“Konferénsia ne’e, ita nia espetativa ema internasionál sei partisipante liu 70 resin, no ita espera katak sira bele mai depois fahe prátika diak sira ne’ebe maka sira halo iha sira nian nasaun,” Arvind esplika.