Reportajen Silvino Freitas
Ajénsia Nasoens Unidas UNICEF entrega sistema enerjia solar ida no hadi’a instalasaun bee no saneamentu iha Vila Maumeta, Atauro, ba Governu Timor-Leste iha ámbitu projetu ida-ne’ebé finansia husi KOICA programa ‘Asaun Klimátika ba Milla Ikus Kobre labarik-sira ne’ebé mak vulnerável liu, nune’e husi melloramentu hirak-ne’e fó benefísiu ba sentru saúde komunitária, eskola no sede suku, hodi tulun fornese servisu ne’ebé fiável liu ba labarik no família sira.
Husi projeitu ne’ebé apoiu husi UNICEF ne’e hodi responde ba dezafiu ne’ebé mak akontese ba tempu naruk, ne’ebé kauza husi falta enerjia eletrisidade iha illa Atauro, Sistema solar foun ne’e fornese enerjia kontinua ba kuidadu saúde, edukasaun no servisu komunitáriu-sira, enkuantu hadi’a instalasaun bee no saneamentu-sira suporta kondisaun ne’ebé saudavel no seguru liu.
“Ita haree ona katak projetu ne’e lori ksolok ba komunidade. Ita-nia povu sente orgullu atu haree mudansa hirak-ne’e sai realidade no iha esperansa kona-ba saida mak ida nee nia signifikadu ba futuru. Asesu ne’ebé fiável ba eletrisidade no bee no servisu públiku ne’ebé di’ak-liu, fó oportunidade boot-liu ba ita-nia oan no família-sira atu hetan susesu,” dehan Mateus Belo, Prezidente Autoridade Administrativa Atauro, liuhusi komunikadu ne’ebé Neon Metin asesu iha loron, (15/07).
Reprezentante UNICEF iha Timor Leste Patrizia Digiovanni dehan, Investimentu hirak-ne’e importante liu-liu iha Timor-Leste, iha ne’ebé inundasaun, bai-loron naruk no perigu sira seluk ne’ebé relasiona ho klima kontinua estraga servisu esensiál sira. Ho halo eskola, fasilidade saúde no sistema bee-moos sira sai reziliente liu.
“ami ajuda labarik no família-sira atu kontinua asesu ba servisu hirak-ne’e, maske iha situasaun emerjénsia” dehan Patrizia DiGiovanni, Reprezentante País UNICEF iha Timor-Leste.
Diretora KOICA iha Timor Leste Youn Hwa Kang reforsa, projetu ne’e la’ós de’it atu entrega infraestrutura maibe ne’e hanesan investimentu ida iha komunidade-sira ne’ebé saudavel liu, família sira ne’ebé forte liu, no futuru ne’ebé naroman liu ba labarik-sira iha Timor-Leste, nune’e KOICA nafatin iha komitmentu atu servisu hamutuk ho Governu Timor-Leste no UNICEF hodi harii komunidade reziliente.
Nune’e, investimentu hirak-ne’e sei ajuda komunidade-sira atu hasoru efeitu husi mudansa klimátika, inklui inundasaun no bai-loron naruk, no mós asegura asesu ba servisu esensiál-sira. Fornesimentu eletrisidade ne’ebé fiável sei suporta armazenamentu vasina, prestasaun saúde no aprendizajen, no mós hamenus dependénsia ba fonte eletrisidade ne’ebé karun liu no la fiável.
