Reportajen Umbelina dos Reis
Konsellu Sentrál ba kongresu Resistência Nacional dos Estudantes de Timor-Leste (RENETIL) apela ba membru hotu-hotu atu partisipa ho másimu iha Kongresu Nasional ba dala-IX, ne’ebé sei realiza iha Kampus UNPAZ. Atu hametin unidade organizasaun, halo avaliasaun ba dalan luta durante ne’e no define orientasaun estratéjiku ba futuru RENETIL.
Prezidente Konsellu Sentrál RENERTIL Jose António de Jesus Das Neves hateten, relasiona ba Kongresu RENETIL ba dala IX ne’e RENETIL ho idade 38 anus ona, Kongresu ba dala-IX ne’e ho dimensaun tematika tolu ” pasadu, prezente no futuru” nune’e kongresista sira orsida borda ho prespektiva kritika konaba pasadu mais iha kontestu konstrusaun estadu ba dezenvolvimentu iha Timor-Leste lao ona durante 24 anus, nune’e presiza haree ba pasadu durante 24 anus ne’e rekonstrusaun dezemvolvimentu estadu ne’e maisumenus nia kualidade no fundamentu ne’e lao too iha ne’ebe. Parte ida hanesan organizasaun rezisténsia mais agora hanesan organizasaun de politika de masa ida que kontinua mantein ninia konfrimisiu politiku anterior iha tempu rezisténsia no tempu ukun-an nian. Tanba ne’e mak Kongresu ba tinan haat ne’e sempre bolu no fanu fila-fali membru sira hotu para halo analiza ba kritika ba ita-nia situasaun para oinsá RENETIL hanesan organizasaun ne’ebe kontribui diakliu ba lalaok dezemvolvimentu, membru governu ne’ebe halao knaar estadu nian, sosiedade sivil, komunidade no setor privadu.
” Tanba ne’e mak atu realiza Kongresu ba dala-IX nee konvida fila-fali membru RENETIL sira hotu ne’ebe namkari iha munisípiu sira hotu.” Dehan Prezidente Konsellu Sentrál RENERTIL Jose António de Jesus Das Neves, ba jornalista sira iha sede RENETIL Farol, kuarta-feira, 15/07.
Nia dehan, durante semana rua resin ona membru sira mai rejistu ona atu partisipa iha kongresu, ita preve komisaun organizadora, komite orietadora preve maisumenus partisipante ba Kongresu ne’e iha ema nain 600 resin. Iha ne’eba mos ami loke ona rejistu online i nafatin nakloke ba momentu ne’ebe Kongresu atu hahu.
” Militante sira-ne’ebe atu mai ne’e husi munisípiu hotu-hotu, ita uza mekanizmu sira-ne’ebe mak uza atu kontaktu ba sira liuhosi media sosial RENETIL nian.” Nia informa.
Iha fatin hanesan, Vise komisaun organizador RENETIL, Jose Jaquelino informa, husi komisaun organizadora nia servisu mak too ohin loron faze preparasaun remata ona, agora hein atu tama ba faze realizasaun kongresu ba dala-IX nian. “provizoriamente membru RENETIL ne’ebe mak konfirmadu iha kongresu ne’e maisumenus iha 300 resin ona nune’e sei loron hira tan espera bele aumenta tan membru husi numeru ida-ne’e.”
Iha fatin hanesan, Seksaun Programa RENETIL, Redmila Pereira dehan, husi parte programa ba kongresu dala-IX ne’e loron primeiru sei iha palestra ho topiku tolu ne’ebe relevante ho tema ne’ebe RENETIL fo sai iha subtema katak “hakbiit konsiénsia kritika iha prosesu konstrusaun estadu no transformasaunn nasional.”
“Iha kongresu ne’e sei konvida oradór nain tolu atu hatoo sira nia palestra iha ne’eba, loron ba da-ruak sei iha diskusaun nune’e sira konvida UNDP, nune’e bele hatoo sira nia hanoin konaba dezemvolvimentu nasaun nian. Nune’e mos iha diskusaun jeral ba membru RENETIL para fo hanoin hamutuk ba organizasaun RENETIL nia futuru.” Nia konklui.
