Reportajen Santina Lucia da Costa
Prezidente Konsellu Imprensa (KI), Virgilio da Silva Guterres, husu jornalista sira, bainhira halo kobertura labele ansi atu publika sedu, wainhira atu publika notisia tenki ho faktus, verifikasaun no konfirmasaun, la’o velosidade neineik maibé lori diferensa.
Prezidente KI Virgilio da Silva Guterres hateten asuntu ne’e liuhusi Seminariu ho tema “Jornalizmu iha Ameasa Dijitalizasaun” iha ambitu komemorasaun loron liberdade imprensa ne’ebé hala’o iha Salaun Delta Nova.
Prezidente KI, dehan, Internasionalmente loron 3 Maiu sai hanesan loron importante, la’os de’it atu selebra susesu sira ne’ebé ké Jornalizmu hatudu, maibé atu hanoin hikas papél jornalizmu nian, liuliu jornalizmu ho dezafiu ne’ebé ké tinan ba tinan kontinua aumenta. Agora dadauk ita moris iha era-dijitalizasaun entaun, ameasa ne’e ita hamutuk atu identifika ameasa saida de’it maka Jornalizmu infrenta.
Virgilio da Silva Guterres, hateten, Ameasa agora sai hanesan asaun kontra asaun ba ita sira ne’ebé mak halo jornalizmu ho kualidade iha seluk mós sira nia ataké hasoru Jonalizmu kualidade ne’e ho meius ne’ebé iha kualidade mós, dezinformasaun hala’o husi profisional sira ne’ebé ké inklui grupu politiku sira uza atu bele hamosu dezinformasaun iha komunidade nia leet.
Virgilio Esplika, Tempu velosidade iha ne’ebé ita ema sai eskravu ba velosidade atan ba velosidade, ita hakarak to’o uluk, molok ema seluk to’o, nune’e mós Jornalizmu agora Plataforma online dijital sira hadau malu lalais, hakarak to’o , sira mak sai uluk, mosu ba publiku, maibé nia ameasa mak ne’e, hakarak lais liu to’o iha fatin lalori buat ida, nein faktus, verifikasaun, no konfirmasaun, Rumoris mak sai, entaun ida ne’e mak ameasa boot Jornalizmu nian iha tempu agora.
“Velosidade ne’e ilustrasaun pratiku ida, ita kuandu lori motor ka kareta halai maka’as ita laharee buat ida, mais ita la’o neneik ita haree buat ida, tanba Jornalizmu agora opsaun sei iha, neineik ita to’o iha ita nia publiku, maibé to’o lori diferensa, lori faktus, dadus, investigasaun.” hateten, Prezidente KI, Virgilio da Silva Guterres, iha Salaun Delta Nova, 3/5.
Seminariu refere, hetan partisipasaun husi, Ministru Asuntu Parlamentar no Komunikasaun Sosial (MAPKOMS), Reprezentante Ministeriu Administrasaun Estatal (MAE), Centru Nasional Chega, Asosiasaun Jornalista Timor-Leste, (AJTL), Timor-Leste Press Union (TLPU), Media online, Eletronik no Jornal, Estudante UNTL, UNITAL, UNPAZ no seluk tan.
