Reportajen Silvino Freitas
Alumni Parlamentu Foin-sa’e Timor Leste (APFTL) liuhusi programa Feto Foin-sa’e Sekulu XXI realiza atividade diálogu ambientál, kona-ba mudánsa klimátika no finansiamentu klimátika, nune’e bele halo advokásia ba fundu klimátika no mobiliza kapasidade hodi hasae konsénsia komunitaria ba alterasaun no mitigasaun mudánsa klimátika nian.
Elizabeth Belo nu’udar Koordenadora APFTL dehan, durante ne’e APFTL hamutuk ho Oxfam iha Timor Leste hala’o advokásia ba fundu finansiamentu klimátika ne’ebé Timor Leste ezekuta, nune’e advokásia ba feto vulnerable sira no grupu sira ne’ebé afetadu ba implementador projetu nune’e sira halo mós advokásia ba grupu sira iha munisípiu hodi sosializa ba grupu sira kona-ba fundu klimátika iha Aileu no RAEOA.
“Aleinde halo sensibilizasaun ami mós halo estudu kazu ba iha munisípiu nune’e ami sei halo relatóriu hodi entrega ba parte relevante sira ligadu ho finansiamentu klimátika nian” dehan koordenadóra APFTL Elizabeth iha salaun Delta-Nova, (13/02).
Nia dehan tan, maskí Timor Leste vitíma ba mudánsa klimátika maibé la’ós de’it vitíma maibé bele sai mós emitor ba mudánsa klimátika ne’ebé dadaun ne’e mundu infrenta, tanba ita iha asaun sira ne’ebé ita halo negativu ba ambiente mak ita sei kontribui ba mudánsa klimátika refere.
Fatin hanesan, Sekretaria Estadu Igualidade Jéneru Elvina de Souza konsidera APFTL nu’udar grupu ida ne’ebé iha kapasidade atu hasa’e konsénsia sosiedade nian kona-ba mudánsa klimátika hodi halo alterasaun no mitigasaun, nune’e mudánsa klimátika ne’e realidade ne’ebé ita tenke hasoru nune’e ita presiza junta forsa hamutuk atu hasoru.
“Hanesan membru governu fo apresiasaun ba ita boot sira, maskí joven maibé ita boot sira fo ita boot sira nia esforsu tomak no interese ne’ebé boot tebes ba interese komun” dehan SEI Elvina Souza iha ninia intervensaun iha salaun delta-nova, (13/02).
Nia dehan tan, grupu feto foin-sae sekulu XXI hola kna’ar importante atu promove atividade sira ne’ebé hasa’e konsénsia liuhusi dialogu no kampaña ba mudánsa klimátika nian, la’ós de’it atividade dialogu maibé iha mós atividade real no konkreta ne’ebé bele halo hodi hasa’e konsénsia komunitaria kona-ba mudánsa klimátika nian, nune’e atividade ne’ebé joven APFTL halo hodi muda hanoin no hahalok ne’ebé la dun kontribui ba mudánsa klimátika.