Reprezentante David da Costa
Komunidade iha postu Administrativu Matebian no mos postu administrativu Quelicai, Munisípiu Baucau, prekupa tebes ba pulsa ahi tanba komunidade sira iha postu refere sosa pulsa ahi eletrisidade iha Baucau ho Dili.
Komunidade suku Abo, Postu Administrativu Matebian, Munisípiu Baucau, Joaquin Domingos Soares, Kona-ba eletrisidade iha ne’e lakan normal no ida ne’e laiha buat ida, maibé problema maka pulsa ahi mak la faan iha ne’e no komunidade sira ne’e balun sosa fali iha Baucau no Dili mak haruka liuhusi telfone mai mak foin hense hodi uza.
“Ami preokupa tebes ba pulsa ahi eletrisidade, tanba iha ne’e la faan pulsa ahi eletrisidade no ami sosa fali iha Baucau no balun oan, alin sira iha Dili ami telfone sira sosa mak foin kirim mai ami, se la kirim mai ami kalan ida ka rua tur iha nakukun laran,” dehan komunidade suku Abu, Postu Administrativu Matebian, Munisípiu Baucau ba Neon Metin iha Da’e Mena, Sabadu 8/03.
Nia haktuir tan uluk ne’e sira faan iha ne’e iha fatin rua ka tolu maibé halo nusa mak sria la faan fali ne’e la hatene, no komunidade iha ne’e sosa pulsa ahi eletrisidade tinan rua resin ona sosa pulsa eletrisidade iha Baucau ho Dili.
“Tinan rua resin ami tenke sosa pulsa ahi eletrisidade iha Baucau no Dili, telfone sira kirim mai deit. No sira laiha familia ne’e husu ajuda ba ami iha telfone ne’e mak sosa fali sira nian,” Nia esplika.
Nia esplika liu tan, komunidade sira ne’ebe maka osan iha selu ba kareta ne’e bele ba hola rasik iha Baucau, maibé ida osan laiha ne’e husu ajuda ba komunidade sira seluk mak ba sosa sira nia pulsa ahi eletrisidade. Tanba ne’e rekomenda ba parte Eletrisidade de Timor-Leste EDTL atu loke pulsa ahi eletrisidade iha ne’e, atu nune’e komunidade sira labele la’o dook maka sosa pulsa ahi eletrisidade.
“Rekomenda ba governu atu loke pulsa ahi eletrisidade besik liu ami komunidade, tanba ami hela dook, transporte mos ita tenke selu mak ba sosa, ida ne’e maka problema ba ami,” Nia rekomenda.
komunidade Suku Maluru, Postu Administrativu Matebian, Munisípiu Baucau, Virgílio Pinto da Silva, hateten, sira prekupa tebes ba pulsa ahi, tanba komunidade sira iha ne’e tenke sae kareta ba Baucau mak foin sosa pulsa ahi, tanba iha ne’e faan laiha ida.
“Ita nia pulsa eletrisidade faan iha ne’e laiha, ami liga ba Baucau mak sira kirim deit mai no ami tun ba fali Baucau maka selu sira nian osan fali, ida ne’e sai problema ida ba ami,”Nia dehan.
Tanba ne’e husu ba governu liu-liu ba iha Eletrisidade de Timor-Leste EDTL atu loke pulsa ahi eletrisidade ida iha postu administrativu Matebian ne’e atu komunidade sira bele sosa pulsa ahi eletrisidade karik bele la’o besik no labele la’o ba dook mak hetan pulsa ahi eletrisidade.
Nune’e mós komunidade suku Bualale, Postu Administrativu Quelicai, Gabriela Da Conceição mos prekupa kona-ba pulsa ahi eletrisidade tanba komunidade sira iha Suku refere mos sosa pulsa iha Baucau no dala ruma ahi eletrisidade mate tiha loron ida ka rua hanesan ne’e maka lakan fali, tanba komunidade sira laiha transporte ne’e labele ba dook sosa pulsa no sira husu ajuda fali ema seluk mak ba hola sira nia pulsa ahi eletrisidade.
“Ami iha problema ida mak kona-ba pulsa eletrisidade, pulsa eletrisidade la faan iha postu administrativu, faan mak iha munisípiu, dalaruma ahi eletrisidade bele mate tanba ami transporte laiha entaun ami la to’o iha Baucau atu hola pulsa eletrisidade. No dala barak ami titip osan tuir deit ba kondutor kareta, no sira mak sosa fali pulsa eletrisidade hodi lori mai” dehan Gabriela
Tanba ne’e husu ba governu, se bele pulsa ahi eletrisidade ne’e bele loke iha postu administrativu ka suku atu nune’e besik liu ba komunidade sira ne’ebe vulnerável liu ne’e, atu nune’e sira la’o besik hodi bele sosa pulsa ahi eletrisidade.
“Ami husu ba governu, atu bele faan pulsa ahi iha ami nia suku no postu para ami bele la’o besik hodi sosa pulsa eletrisidade, tanba komunidade hanesan inan faluk no oan kiak sira ahi eletrisidade la lakan tanba osan iha ne’ebe mak atu seluk ba transporte hodi ba hola pulsa iha dook ne’ebá,” Nia husu governu.